“Gəncə Regional Qadın Mərkəzi” İctimai Birliyi Azərbaycan Respublikası QHT-ə Dövlət Dəstəyi Agentliyinin maliyyə dəstəyi ilə “Gəncədə su israfı əleyhinə maarifləndirmə” layihəsinin icrasına başlamışdır.
Layihənin əsas məqsədi Gəncə şəhərində əhali arasında su ehtiyatlarından səmərəli istifadə vərdişlərinin formalaşdırılması, su israfının azaldılması və ekoloji məsuliyyətli davranışların təşviq edilməsi yolu ilə su resurslarının qorunmasına töhfə verməkdir. Məlumdur ki, son illərdə iqlim dəyişikliyi ilə bağlı su qıtlığı bütün dünyada baş verir və Azərbaycan, o cümlədən Gəncə də kənarda qalmır. Xüsusilə şirin su mənbələrinin azalması əsas risklərdəndir.
Layihə çərçivəsində Gəncə Dövlət Universitetinin nəzdində Regional Kollecdə müəllim heyəti və tələbələrlə görüş keçirilmişdir. Görüşdə layihənin məqsədi haqqında məlumat verilmişdir. Azərbaycanın su ehtiyatları barədə geniş məlumat verilmiş və bu barədə çəkilmiş çarx nümayiş etdirilmişdir. Sonra Gəncədə su ehtiyatı və mənbələri haqqında, Gəncədə su-kanalizasiya sisteminin yenilənməsi və qənaət edilməsində sayğacların rolu, gələcək planlar haqqında da məlumat verilmişdir. SECAP-da Gəncənin su-kanalizasiya sistemi üzrə hazırlanmış hesabat auditoriyaya təqdim edilmişdir.
Görüşdə kollecin direktoru Nigar Səfixanova və digər müəllimlər, tələbələr çıxış edərək hər damlası qiymətli olan su ehtiyatlarının qorunmasının strateji olmasını xatırlatmışlar. İştirakçıların nəzərinə çatdırılmışdır ki, sudan ehtiyatla istifadə edilməsində gənclərin və yeniyetmələrin, onların vasitəsilə digər ailə üzvlərinin maarifləndirilməsi yolu ilə daha çox Gəncə əhalisinin maarifləndirilməsi əsas hədəflərdəndir.
Layihə fəaliyyəti davam edir.
