65 yaşdan sonra şəxsi gigiyena ilə bağlı gündəlik vərdişlərə yenidən baxmaq lazım gələ bilər. Yaş artdıqca dəri nazikləşir, quruyur və həssaslaşır. Buna görə də tez-tez yuyunmaq dəridə qıcıqlanmanı gücləndirə və xoşagəlməz hisslər yarada bilər.
Mütəxəssislər yaşlı insanların nə qədər tez-tez duş qəbul etməli olduğunu və hansı qaydalara əməl etməli olduqlarını açıqlayıblar.
“Hazipatika” nəşrinin yazdığına görə, 65 yaşdan yuxarı insanlar üçün hamıya aid vahid çimmə norması yoxdur. Su prosedurlarının tezliyi insanın fərdi xüsusiyyətlərindən, dərisinin vəziyyətindən, fiziki aktivliyindən, hava şəraitindən və tərləmə intensivliyindən asılıdır.
Yaşlı insanların çoxu üçün həftədə bir neçə dəfə duş qəbul etmək kifayət edə bilər. Digər günlərdə isə bədənin ayrı-ayrı nahiyələrinin təmizliyinə diqqət yetirmək vacibdir. Bununla belə, gündəlik duş qəbul etmək qadağan deyil. Əgər insanın buna ehtiyacı varsa və bu, dəridə həddindən artıq quruluq və ya qıcıqlanma yaratmırsa, hər gün yuyunmaq mümkündür.
Havalar isti olduqda, fiziki fəaliyyətdən sonra və ya tərləmə artdıqda daha tez-tez çimməyə ehtiyac yarana bilər.
Dərinin vəziyyətinə nə üçün diqqət yetirmək lazımdır?
Yaş artdıqca dəri tədricən nəm saxlamaq qabiliyyətini itirir, nazikləşir və daha az təbii yağ ifraz edir. Nəticədə qabıqlanma, qaşınma və həssaslığın artması müşahidə oluna bilər.
Su prosedurlarının düzgün aparılmaması da əlavə risk yaradır. Xüsusilə isti su, uzun müddət duş qəbul etmək və sərt yuyucu vasitələr dərinin təbii qoruyucu təbəqəsini poza bilər.
65 yaşdan sonra duş necə qəbul edilməlidir?
Mütəxəssislər ilıq sudan istifadə etməyi və duş müddətini 5-10 dəqiqə ilə məhdudlaşdırmağı məsləhət görürlər. Həddindən artıq isti su və uzun müddət çimmək dərinin qurumasını sürətləndirə bilər.
Gündəlik gigiyena üçün ətirsiz, yumşaq təmizləyici vasitələr seçmək daha məqsədəuyğundur. Qoltuqaltı nahiyələrə, qasıq bölgəsinə, xarici intim nahiyələrə və ayaqlara xüsusi diqqət yetirilməlidir.
Bununla belə, hər gün bütün bədəni sabunlamağa və dərini güclü şəkildə sürtməyə ehtiyac yoxdur.
Duşdan sonra bədəni dəsmalla sürtmək əvəzinə, yüngül hərəkətlərlə qurulamaq tövsiyə olunur. Dəri hələ bir qədər nəmli olarkən nəmləndirici krem çəkmək məsləhətdir. Bu, dəridə nəmin qorunmasına və quruluq ehtimalının azalmasına kömək edir.
Beləliklə, 65 yaşdan sonra əsas məsələ duşun neçə dəfə qəbul edilməsi deyil, dəriyə düzgün qulluq göstərilməsi və orqanizmin fərdi ehtiyaclarının nəzərə alınmasıdır.
Sunay
