Quantanamo həbs düşərgəsinin ən yaşlı məhbusu, pakistanlı iş adamı Seyfullah Paraça təxminən iyirmi il həbsdə yatdıqdan sonra mühakimə olunmadan ölkəsinə geri qaytarılıb.
Azpost.info “Dawn”a istinadən xəbər verir ki, 75 yaşlı Paraça 2003-cü ilin iyulunda Taylandda keçirilən beynəlxalq əməliyyat nəticəsində həbs edilib. Amerika səlahiyyətliləri onun Əl-Qaidənin maliyyələşdirilməsinə kömək etdiyini və həmçinin partlayıcı maddələrin ABŞ-a qaçaqmalçılıq yolu ilə daşınmasında onlara kömək etməyə çalışdığını iddia edib. Bununla belə, ona heç vaxt rəsmi ittiham irəli sürülməyib.
Həbsdə olarkən iki dəfə infarkt keçirən məhbus bir dəfə Quantanamodakı həyatı “öz məzarında yaşamaq” kimi təsvir edib.
Onun vəkili Şelbi Sullivan-Bennis deyib ki, Quantanamo həbsxanasında S.Paraçanın vəkili olduğu illər ərzində ona ikinci ata kimi olmuş bir adam yenicə evinə qayıdıb: “Heç vaxt cinayətdə ittiham olunmayan Seyfullah Paraça federal hakimlər və hərbi nümayəndələr qarşısında illərlə dinləmələrdən keçib və o, bütün göstəriciləri təmizləyib”.
Pakistan Xarici İşlər Nazirliyi onun azadlığa buraxılmasını alqışlayıb və S.Paraçanın oktyabrın 29-da Pakistana çatdığını təsdiqləyib: “Xaricdə saxlanılan Pakistan vətəndaşının nəhayət ailəsinə qovuşmasına şadıq”.
ABŞ-da təhsil almış S. Paraça ABŞ rəsmiləri tərəfindən Əl-Qaidənin bəzi yüksək səviyyəli liderləri, o cümlədən Usamə bin Laden və Xalid Şeyx Məhəmmədlə əlaqə saxlamaqda ittiham edilib. Əfqanıstanın Baqram şəhərindəki ABŞ hərbi həbsxanasında 14 ay qaldıqdan sonra o, Quantanamoya köçürülüb.
Bayden administrasiyası keçən il başqa bir Pakistan vətəndaşı, 55 yaşlı Abdul Rabbani ilə birlikdə Paraçanın azad edilməsini təsdiqləyib. Lakin ABŞ və Pakistan arasında repatriasiya razılaşmasının yekunlaşması bir qədər vaxt apardığı üçün proses ləngiyib.
11 Sentyabr Komissiyasının Hesabatında “11 sentyabr hücumlarının əsas memarı” kimi adı çəkilən Xalid Şeyx Məhəmməd də daxil olmaqla 35 nəfər hələ də Quantanamoda saxlanılır. Onun vəkili Clive Stafford-Smith BBC-yə deyib ki, o, yaxın aylarda daha çox məhbusun azad ediləcəyini gözləyir: “Mənim hələ də Quantanamoda dörd müştərim var, onların hamısı azadlığa buraxılıb. Bu, ABŞ üçün utancvericidir”.
ABŞ-ın Kubadakı hərbi həbsxanasında vaxtilə yüzlərlə silahlı şübhəli var idi. Quantanamonun siyahısını saxlayan “Washington Post “qəzeti 779 məhbusun həbs düşərgəsinə gətirildiyini, lakin onların əksəriyyətinin heç bir ittiham irəli sürülmədən sərbəst buraxıldığını bildirib. ABŞ hökuməti bu azad edilmiş məhbusların çoxunu düşmən döyüşçüləri kimi təsnif etməkdə davam edir.
L.SƏMLA
