ABŞ 5 illik fasilədən sonra rəsmi olaraq YUNESKO-ya qayıdıb.
Azpost.info xəbər verir ki, bunu, təşkilatın baş direktoru Odri Azule bildirib.
“Bu, YUNESKO üçün əla xəbərdir. Təşəbbüslərimiz bütün dünyada daha güclü olacaq”, – Azule deyib.
ABŞ-ın qayıdışı ilə YUNESKO-da 194 ölkə təmsil olunur. İyulun sonunda VIP qonaqların iştirakı ilə rəsmi bayraq qaldırma mərasiminin keçirilməsi də gözlənilir.
Qeyd edək ki, iyunun əvvəlində Birləşmiş Ştatlar YUNESKO-ya yenidən üzv olmaq qərarı barədə məlumat vermişdi. Bunun ardınca ABŞ dövlət katibinin idarəetmə və resurslar üzrə müavini Riçard Verma BMT-nin mədəniyyət agentliyinə Vaşinqtonun təşkilata borcunu ödəmək planı da daxil olmaqla məktub göndərmişdi.
Ötən ilin dekabrında ABŞ Konqresi YUNESKO-ya 500 milyon dollardan çox üzvlük haqqını təsdiqlədi və bu, ölkənin yenidən təşkilata üzv olmasına imkan verdi.
“Associated Press” yazır ki, bu qərar Çinin təşkilatın lideri kimi ABŞ-ın yerini tutacağından qorxduğu üçün verilib.
Azpost.info
