ABŞ hərbçiləri Karib dənizində daha bir tankerin ələ keçirildiyini bəyan ediblər. AzPost ABŞ ordusunun Cənub Komandanlığına istinadla xəbər verir ki, söhbət Sophia adlı tankerdən gedir. Bildirilib ki, gəmi sanksiya rejiminin təmin olunması məqsədilə aparılan əməliyyat çərçivəsində saxlanılıb. Hazırda tanker ABŞ sahillərinə doğru müşayiət olunur.
Məlumata görə, əməliyyat Karib dənizində həyata keçirilib və prosesə ABŞ Hərbi Dəniz Qüvvələrinin bölmələri cəlb olunub. Rəsmi açıqlamada qeyd edilir ki, tankerin saxlanılmasına səbəb bölgədə qanunsuz fəaliyyətlə məşğul olmasıdır. ABŞ tərəfi bu fəaliyyətin konkret detallarını açıqlamasa da, sanksiyaların pozulması ehtimalının araşdırıldığı vurğulanıb.
Cənub Komandanlığı bildirir ki, dənizdə təhlükəsizliyin təmin olunması və beynəlxalq qaydalara əməl edilməsi prioritet məsələdir. Qeyd olunur ki, bu cür əməliyyatlar regionda sabitliyin qorunmasına xidmət edir. Hərbi qurumun açıqlamasında oxşar hallara qarşı nəzarətin gücləndiriləcəyi də diqqətə çatdırılıb.
Ekspertlər hesab edirlər ki, son vaxtlar Karib hövzəsində tankerlərlə bağlı tədbirlərin artması sanksiya nəzarətinin sərtləşdirilməsi ilə bağlıdır. Bildirilir ki, Sophia tankerinin taleyi aparılan araşdırmaların nəticəsindən asılı olacaq. ABŞ tərəfi prosesin beynəlxalq hüquq normaları çərçivəsində davam etdiriləcəyini bəyan edib.
