“Rusiyanın Ukraynaya qış hücumu cəbhədə ciddi irəliləyişlərə səbəb olmasa da, böyük itkilərlə nəticələnib”.
Azpost.info xəbər verir ki, bunu Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi bildirib.
Onun sözlərinə görə, ötən dekabrdan bəri cəbhədə ölən və yaralanan rusların sayı 100 mindən çox olub. Onlardan 20 mindən çoxu döyüşlərdə həlak olub: “Bu itkilərin demək olar ki, yarısı Baxmuta hücuma atılan “Vaqner” döyüşçülərinin payına düşür. “Vaqner”in qurucusu Yevgeni Priqojin isə cəmi 94 nəfər itirdiklərini deyir. Bu, sadəcə gülməlidir”.
Kirbi qeyd edib ki, qış kampaniyası nəticəsində Rusiyanın hərbi ehtiyatları və hərbi qüvvələri tükənib. Üstəlik, Moskvanın səylərinin əksəriyyəti əks nəticə verib: “Rus ordusu Baxmut uğrunda döyüşlərdə dalana dirəndi və uğursuzluğa düçar oldu. Rusiyanın hücum cəhdi əks nəticə verdi. Aylarla davam edən döyüşlərdən və fövqəladə itkilərdən sonra Rusiya diqqətini Ukraynanın məhdud strateji dəyəri olan bir şəhərinə cəmləyib”.
Sonuncu dəfə Rusiya Müdafiə Nazirliyi itkilər barədə 2022-ci ilin sentyabrında məlumat vermişdi. Həmin vaxt Şoyqu bildirmişdi ki, Ukraynada müharibə başlayandan indiyədək 5937 rus hərbçisi həlak olub.
ABŞ rəsmilərinə görə isə Rusiyanın itkiləri 223 minə qədərdir. Onlardan 43 minə qədəri döyüşlərdə həlak olub.
Azpost.info
