Ağ Evin mətbuat katibi Karolin Levit jurnalistlərə açıqlamasında ABŞ Prezidenti Donald Trampın anti-Rusiya sanksiyalarını lazım gəldikdə sərtləşdirməyə hazır olduğunu bəyan edib. O bildirib ki, Tramp bu aləti “öz arsenalında saxlamağa diqqətli yanaşır” və sanksiyaları diplomatik təzyiq vasitəsi kimi istifadə etməyi məqsədəuyğun sayır.
AzPost bildirir ki, Ağ Ev yeni sanksiyaların tətbiqi üçün hüquqi imkanların mövcud olduğunu və bu sanksiyaların əsasən Rusiya bankları ilə enerji sektorunu hədəf alacağını açıqlayıb. Lakin Tramp hələlik bu addımı atmaqda tələsmir və vəziyyətin inkişafına uyğun qərar verməyi planlaşdırır.
Mətbuat katibi əlavə edib ki, ABŞ Prezidenti Ukraynadakı münaqişənin siyasi həlli istiqamətində istənilən irəliləyişə müsbət yanaşır. Analitiklər hesab edirlər ki, Tramp hazırkı mərhələdə danışıqlar üçün diplomatik imkanları tükətmədən yeni məhdudiyyətlər tətbiq etməyəcək.
Xatırladaq ki, Tramp daha əvvəl Ukraynada 30 gün ərzində atəşkəs əldə olunmasa, Rusiyaya qarşı yeni sanksiyaların gündəmə gətirilə biləcəyini qeyd etmişdi. ABŞ administrasiyası bu yanaşma ilə həm siyasi təzyiqi qoruyur, həm də iqtisadi təsirləri balanslaşdırmağa çalışır.
