Azərbaycanda rəqəmsallaşma gündəliyinin əsas hədəflərindən biri dövlət xidmətlərinin 80 faizdən çoxunun rəqəmsallaşdırılmasıdır.
AZƏRTAC xəbər verir ki, bunu İnnovasiya və Rəqəmsal İnkişaf Agentliyinin sədri Fərid Osmanov “Bakı İqlim Fəaliyyəti Həftəsi 2026” çərçivəsində keçirilən “COP29-dan İqlim Həftəsinə: Yaşıl dünya üçün rəqəmsal fəaliyyət yolu” adlı sessiyada deyib.
O bildirib ki, rəqəmsallaşma ayrı-ayrı xidmətlərin elektronlaşdırılması ilə məhdudlaşmamalı, gündəlik proseslərə geniş miqyasda təsir göstərməlidir. Milli səviyyədə tətbiq olunan rəqəmsal həllər vətəndaşların və biznes subyektlərinin gündəlik proseslərini əhəmiyyətli dərəcədə dəyişir.
Fərid Osmanov qeyd edib ki, Azərbaycan son dövrdə rəqəmsal inkişaf konsepsiyası, süni intellekt strategiyası, rəqəmsal sürətləndirmə və fəaliyyət planı da daxil olmaqla, bu sahədə bir sıra mühüm sənədlər qəbul edib.
Agentlik sədri bildirib ki, növbəti üç il üçün əsas məqsədlərdən biri dövlət xidmətlərinin daha proaktiv formata keçirilməsidir. Bu yanaşma dövlətlə vətəndaşlar, eləcə də biznes arasında qarşılıqlı əlaqənin sadələşdirilməsinə və xidmətlərin vətəndaşın müraciətini gözləmədən təqdim edilməsinə imkan verəcək.
“Əsas hədəf dövlət xidmətlərini daha görünməz və proaktiv etməkdir. Xidmətləri vətəndaşlara və biznesə daha səmərəli şəkildə çatdırmaq, müraciətlərin, lisenziyalaşdırma proseslərinin, bürokratiyanın və kağız sənədləşmənin minimuma endirilməsi qarşıdakı dövr üçün əsas istiqamətlərdəndir”, – deyə Fərid Osmanov vurğulayıb.
Onun sözlərinə görə, rəqəmsallaşma nəticəsində dövlət-vətəndaş və dövlət-biznes münasibətlərində mövcud boşluqların aradan qaldırılması, xidmətlərə çıxışın asanlaşdırılması və inzibati proseslərin sadələşdirilməsi nəzərdə tutulur.
Fərid Osmanov qeyd edib ki, Azərbaycanın rəqəmsallaşma siyasətinin məqsədi vətəndaşın dövlət xidmətindən istifadə etmək üçün mümkün qədər az vaxt və resurs sərf etdiyi, dövlətlə qarşılıqlı əlaqənin isə daha sadə və çevik olduğu sistem formalaşdırmaqdır.
