Lap qədimdən xalq təbabətində geniş istifadə olunan alma sirkəsi faydalı xüsusiyyətlərinə görə son illər bir qədər də populyarlaşıb. Bəs elm bu içkinin faydaları barədə nə deyir?
Azpost.info xəbər verir ki, Livandan olan bir qrup elm adamı alma sirkəsinin çəkini, qanda qlükozanı və lipid səviyyəsini azaldıb-azaltmadığını araşdırıb.
Artıq çəkili gənclərin iştirakı ilə keçirilən sınaqda iştirakçılardan 12 həftə ərzində hər səhər yeməkdən əvvəl 250 ml suda həll edilmiş 5, 10 və ya 15 ml alma sirkəsi içmək tələb olunub.
Üç aydan sonra məlum olub ki, alma sirkəsi içmək bədən çəkisinin və bədən kütləsi indeksinin əhəmiyyətli dərəcədə azalması ilə nəticələnir. Bu içkini içən insanlar dozadan asılı olaraq 6-8 kq çəki itirib. Onların baldır və bel ətrafı da əhəmiyyətli dərəcədə incəlib.
Bundan başqa, tədqiqat müəllifləri alma sirkəsi içən qruplarda qlükoza, trigliseridlər və xolesterin səviyyələrində əhəmiyyətli dərəcədə azalma olduğunu bildiriblər.
Alma sirkəsi sağlamlığınıza zərər də verə, məsələn, diş minasını məhv edə bilər. Bu riski minimuma endirmək üçün diş həkimləri sirkə qəbulundan sonra ağzınızı su ilə yaxalamağı və tüpürcək istehsalını stimullaşdırmaq üçün şəkərsiz saqqız çeynəməyi tövsiyə edir. Həmçinin, sirkəli su içdikdən dərhal sonra dişlərinizi fırçalamaqdan çəkinməlisiniz.
Azpost.info
