Almaniya vətəndaşlığını əldə etməyi asanlaşdıran qanun layihəsi bu gün Bundestaqda yekun oxunuşdan keçir.
Azpost.info xəbər verir ki, Almaniya hökuməti vətəndaşlıq qanununa düzəlişlər layihəsini 2023-cü il noyabrın 1-də parlamentə təqdim edib.
Noyabrın 30-da Bundestaq digər məsələlərlə yanaşı, ilk vətəndaşlığından imtina etmədən Almaniya pasportunu əldə etməyə imkan verən hökumət qanun layihəsinin ilk dinləməsini keçirdi. Qanun layihəsi əcnəbilərin Almaniyada vətəndaşlığa qəbulunu sürətləndirmək üçün nəzərdə tutulub.
Düzəlişlərə əsasən, bunun üçün ölkədə hazırda olduğu kimi səkkiz il deyil, beş il yaşamaq tələb olunacaq. İnteqrasiyada xüsusi uğurlar halında (alman dilini yaxşı bilmək və könüllü fəaliyyətlərdə iştirak etmək və ya peşəkar uğur və keyfiyyətlər) 3 il kifayət edəcək.
Bundan başqa, Almaniya vətəndaşlığını almış əcnəbilərə də əvvəlki pasportlarını saxlamağa icazə veriləcək.
Əcnəbilərin Almaniyada doğulmuş uşaqları isə avtomatik olaraq Almaniya vətəndaşlığını alacaqlar. Hal-hazırda bu, yalnız valideynlərdən biri Almaniyada 8 ildən çox yaşadıqda baş verir.
Vətəndaşlıq qanunvericiliyinin islahatı vasitəsilə alman hakimiyyəti, digər məsələlərlə yanaşı, Almaniyanı ixtisaslı mütəxəssislər üçün daha cəlbedici etmək niyyətindədir.
“Biz çoxdan cəmiyyətimizin bir hissəsi olan insanların da ölkəmizin demokratik şəkildə formalaşmasında iştirak edə bilmələrini istəyirik. Demokratiyamıza onu müdafiə edən və onu güclü edən insanlar lazımdır”, – Almaniya daxili işlər naziri Nensi Fazer deyib.
Vətəndaşlıq qanununa təklif edilən islahat Bundestaqda səsvermə öncəsi müxalifətin kəskin tənqidinə səbəb olub.
“Hökumət Almaniya vətəndaşlığını dəyərsizləşdirməyə hazırlaşır. Əslində, bu, vətəndaşlığı devalvasiya edən qanundur”, – Bundestaq üzvü Aleksandr Trom bildirib.
Azpost.info
