Zülal
Arıqlamaq, əzələ kütləsini qorumaq və enerjili qalmaq istəyənlər üçün düzgün protein seçimi böyük əhəmiyyət daşıyır. AzPost xəbər verir ki, tanınmış təlimçi Yuri Popko sosial şəbəkədə bu barədə paylaşım edərək, ən təsirli protein mənbələrinin siyahısını açıqlayıb.
Məlumata görə, toyuq filesi 100 qramda 23 qram təmiz proteinlə ən məşhur və əlçatan mənbə hesab olunur. Ondan sonra isə mal əti və dana əti gəlir. Onların da tərkibində təxminən eyni miqdarda — 22-23 qram protein var. Lakin yağ tərkibi karkasın hissəsindən asılı olaraq dəyişdiyi üçün, diqqətli seçim tövsiyə olunur.
Balıq sevərlərə isə ton balığı məsləhət görülür. Bu məhsul həm zülalla, həm də Omeqa-3 yağ turşuları ilə zəngindir. Üstəlik, sazan və digər balıqlar da yaxşı protein qaynağı kimi qiymətləndirilir.
Dəniz məhsulları da arıqlama menyusunda öz yerini alır. Karides və midyə kimi məhsullar 100 qramda 18 qram proteinlə diqqət çəkir və az yağ tərkibinə görə pəhriz rasionuna əla uyğundur.
Fermentləşdirilmiş süd məhsulları arasında 5%-lik pendir ideal seçim sayılır. Hər 100 qramında 18 qram protein var. Lakin yağ tərkibi yüksək olan pendirlərdən uzaq durmaq tövsiyə olunur.
Yumurta isə hər birinin tərkibində təxminən 6 qram proteinlə menyudan çıxarılmamalıdır. Yumurta sarısında isə həm zülal, həm də yağ var ki, bu da balans məsələsində diqqət tələb edir.
Bitki mənşəli protein sevənlər üçün soya, mərcimək və lobya lider mövqedədir. Soya 100 qramda 35 qram proteinlə ilk sıradadır. Lakin karbohidrat tərkibi də nəzərə alınmalıdır.
Qoz-fındıq və qarabaşaq yarması isə zülalın yan mənbəyi kimi qiymətləndirilir. Qoz-fındıq 100 qramda 15-20 qram proteinlə yanaşı 60 qram yağ da ehtiva edir.
Mütəxəssislər həmçinin zülal tozlarından istifadəni də tövsiyə edir. Bir ölçəkdə 25 qram təmiz protein olan bu məhsul, minimum yağ və karbohidratla pəhrizləri daha effektiv edir.
Qeyd edək ki, pəhrizdə zülal miqdarı və yağ balansına diqqət yetirmək arıqlama prosesinin uğurlu olması üçün vacibdir.
