Azərbaycan Respublikasında dövlət uşaq müəssisələrindən uşaqların ailələrə verilməsi (de-institusionalizasiya) və alternativ qayğı Dövlət Proqramı çərçivəsində 2014-cü ildə uğurlu tədbirlər həyata keçirilib. Dövlət Proqramı əsasında risk qruplarından olan uşaqlar və onların ailələri üçün dəstək xidmətləri yaradılıb.
AŞPA-dakı nümayəndə heyətimizin üzvü Könül Nurullayeva qurumun yaz sessiyası çərçivəsində əlilliyi olan uşaqların ailələrə verilməsi ilə bağlı müzakirələr zamanı söyləyib.
Azərbaycanlı deputat dövlət uşaq müəssisələrindən uşaqların ailələrə verilməsi (de-institusionalizasiya) və onlara alternativ qayğı ilə bağlı bir neçə təklif irəli sürüb. Bildirib ki, əlilliyi olan müəyyən qrup və ya fərdi insanlar üçün nəzərdə tutulmuş psixo-maarifləndirici proqramlar yaradılmalıdır. Belə proqramlar xəstəlik, əlamətlər, müalicə, diaqnostika və reabilitasiya haqqında bilik və anlayışa yönəlmiş motivasiya, eləcə də təhsil və davranış üsullarının birləşməsindən ibarət olmalıdır.
K.Nurullayeva icma psixi sağlamlıq qruplarının yaradılmasının zəruriliyinə toxunaraq, belə qrupların müəyyən ərazinin əhalisinə ekspert qiymətləndirilməsi, müalicə və qayğı göstərmək üçün məsuliyyət daşıyacağını deyib. Qeyd edib ki, belə təkliflərin həyata keçirilməsi ilə cəmiyyətlərdə de-institusionalizasiyaya rəvan keçidi təmin etmək olar.
O, de-institusionalizasiya prosesinin, yəni psixi qüsurlu insanların dövlət və ya özəl müəssisələrdən, eləcə də psixiatriya xəstəxanalarından ailələrinə və ya icma əsaslı evlərə köçürülməsinin əhəmiyyətinə toxunub.
