“Avropadakı etirazları absurd qərarlar qəbul edən ölkələrin liderləri şərh etməlidir”.
Azpost.info xəbər verir ki, bunu Rusiya prezidentinin mətbuat katibi Dmitri Peskov deyib.
“Aydındır ki, Avropada insanların, sahibkarların, şirkətlərin həyatı pisləşir, iş pisləşir, pul az qazanılır. Həyat səviyyəsi aşağı düşür. Bu, reallıqdır. Təbii ki, adi vətəndaşların öz ölkələrinin rəhbərliyinə sualları getdikcə çoxalacaq. Bunu şərh etmək bizim işimiz deyil. Qoy, bunu öz ölkələri üçün çox absurd, məntiqsiz və zərərli qərarlar verən Qərb ölkələrinin liderləri etsin”, – Peskov bildirib.
Sentyabrın 3-də Praqanın mərkəzində “Əvvəlcə Çexiya!” şüarı altında etiraz aksiyası keçirilib. Polisin məlumatına görə, aksiyada 70 minə yaxın insan iştirak edib. Etirazçıların tələbləri arasında ölkəni aşağı qiymətlərlə qazla təmin etmək və elektrik enerjisi ödəniş sisteminin dəyişdirilməsi də yer alıb. Çexiyanın Baş naziri Petr Fiala mitinqin rusiyayönlü qüvvələr tərəfindən təşkil edildiyini bildirib.
Qeyd edək ki, Rusiyaya qarşı sanksiyaların tətbiqi fonunda enerji daşıyıcılarının qiymətləri xeyli artıb. Avropa elektrik stansiyalarının beşdə biri qazla işlədiyi üçün təkcə qaz deyil, elektrik enerjisinin də qiyməti rekord səviyyəyə çatıb.
Azpost.info
