Arıqlamaq istəyən insanların bir qismi axşam saatlarında yeməkdən tamamilə imtina edir. Lakin alimlərin apardığı araşdırma göstərib ki, bu üsul artıq çəkidən xilas olmaq üçün gözlənildiyi qədər effektiv olmaya bilər.
Mütəxəssislər uzunmüddətli qida məhdudiyyətlərinin nəticələrini araşdıraraq müəyyən ediblər ki, axşam yeməyini tamamilə dayandırmaq çəkidə müəyyən dəyişiklik yaratsa da, arıqlamaq baxımından ciddi üstünlük vermir.
Araşdırmada 25-45 yaş arasında piylənməsi olan 139 yetkin insanın məlumatları təhlil edilib. İştirakçılar müxtəlif qidalanma rejimlərinə bölünüb və yemək vaxtının bədən çəkisinə təsiri araşdırılıb.
Nəticələr göstərib ki, axşam qidalanmasının məhdudlaşdırılması müəyyən dəyişikliklərə səbəb olsa da, artıq çəki ilə mübarizədə əhəmiyyətli üstünlük yaratmayıb.
Alimlərin fikrincə, arıqlama prosesində əsas amil axşam yeməyinin olub-olmaması deyil, gün ərzində qəbul edilən ümumi qidanın tərkibi və kalori miqdarıdır.
Axşam yeməyindən tam imtina etmək lazımdırmı?
Mütəxəssislər uzun müddət və həddindən artıq qida məhdudlaşdırmasının əlavə problemlərə səbəb ola biləcəyini bildirirlər.
Orqanizmin kifayət qədər qida maddəsi almaması həzm və immun sistemlərinin fəaliyyətinə mənfi təsir göstərə bilər. Balanssız qidalanma uzunmüddətli perspektivdə ürək-damar sağlamlığı üçün də arzuolunmaz nəticələr yarada bilər.
Bu səbəbdən mütəxəssislər axşam yeməyini tamamilə ləğv etmək əvəzinə, sonuncu qidanın tərkibinə və porsiyanın ölçüsünə diqqət yetirməyi tövsiyə edirlər.
Axşam yeməyini daha yüngül etmək və tərəvəzlərlə yanaşı zülal mənbələrindən istifadə etmək mümkündür. Balıq və dəniz məhsulları belə seçimlərdən biri ola bilər.
Son yeməyin konkret vaxtı və porsiyanın ölçüsü isə insanın ümumi qidalanmasından, gündəlik rejimindən və fərdi ehtiyaclarından asılıdır.
Beləliklə, arıqlamaq üçün sadəcə “axşam yeməyini kəsmək” qaydasına güvənmək əvəzinə, gün ərzində balanslı qidalanmaq və qəbul edilən ümumi enerjiyə nəzarət etmək daha əhəmiyyətlidir.
