Həcc ziyarəti
Azərbaycandan olan zəvvarlar Səudiyyə Ərəbistanının Məkkə şəhərində Həcc ziyarətini başa vurublar.
Bu barədə Qafqaz Müsəlmanları İdarəsi sədrinin 1-ci müavini Hacı Salman Musayev açıqlamasında bildirib.
Zəvvarlar Məkkə şəhərində ziyarət dövründə Həccin əməllərini mərhələlərlə yerinə yetiribər. Həcc Ziyarətinin zəvvarların Məkkədən sonra Mədinə şəhərini ziyarət etməsilə yekunlaşdırılması nəzərdə tutulur. S.Musayev bildirib ki, artıq bir neçə gündür Azərbaycan zəvvarları qruplarla mərhələli şəkildə Mədinəyə yola salınıb.
Salman Musayev bildirib ki, iyunun 26-dan azərbaycanlı zəvvarların Mədinədən Azərbaycana qayıdışı başlayır. Sonuncu zəvvar qrupu iyulun 1-də Azərbaycana qayıdacaq.
QMİ rəsmisinin sözlərinə görə, ziyarət dövründə azərbaycanlı zəvvarlardan dünyasını dəyişən olmayıb. Əlavə edib ki, azərbaycanlı zəvvarların olduğu otellərdə həkim qrupları fəaliyyət göstərib. Səhhətindən şikayəti olan zəvvarlar həkimlərə müraciət edib və onlara ilkin tibbi yardım göstərilib. Lakin səhhətinə görə ziyarətini dayandırmaq məcburiyyətində qalan zəvvar olmayıb. Bu il Azərbaycandan Həcc ziyarətində 1500 nəfər zəvvar iştirak edib.
Qeyd edək ki, Həcc Ziyarəti Uca Allahın müsəlmanlara buyurduğu hökmlərindən və İslam dininin təməl şərtlərindən biridir(trend).
