Azərişıq
Ağdam və Füzuli rayonlarında xarici elektrik təchizatının yenilənməsi məqsədilə yeni elektrik veriliş xətləri üçün böyük məbləğlərdə vəsait ayrılıb.
AzPost xəbər verir ki, Ağdamın beş yaşayış məntəqəsini əhatə edən layihəyə ayrılan vəsait 8 milyon 905 min 808 manat təşkil edir.
Söhbət Güllücə, Nəmirli, Tağıbəyli, Qərvənd və Salahlı Kəngərli kəndlərini əhatə edən 35 kV-luq iki dövrəli ÖİN (SİP-3) elektrik veriliş xəttinin çəkilməsindən gedir. Bu işləri həyata keçirmək üçün “Azərişıq” ASC “Harmony Industrial Construction and Engineering Group” MMC ilə müqavilə bağlayıb.
Maraqlıdır ki, bu MMC ilə bağlı açıq mənbələrdə geniş məlumat yoxdur və şirkətin daha əvvəl dövlət sifarişi ilə hansı işləri gördüyü dəqiq bilinmir.
Füzuli rayonunun Qoçəhmədli, Qarğabazar və Cuvarlı kəndlərini əhatə edən bənzər elektrik xətti layihəsi üçün isə 1 milyon 48 min 450 manat ayrılıb. Bu işi isə “19 saylı Tikinti Təmir İdarəsi” MMC həyata keçirəcək. Bu şirkət də daha çox lokal layihələrdə görünür və əvvəlki fəaliyyətinə dair açıq hesabatlıq mövcud deyil.
Hər iki layihə “Azərişıq” ASC tərəfindən elan olunan satınalmalar əsasında reallaşdırılıb. Lakin tender prosesində iştirak edən digər şirkətlərin adları, təkliflər və texniki qiymətləndirmə mərhələsi ilə bağlı ictimaiyyətə heç bir məlumat verilməyib.
