Azərbaycanın qeyri-neft ixracının artırılması son illərdə iqtisadi siyasətin əsas istiqamətlərindən birinə çevrilib. İqtisadçılar hesab edirlər ki, enerji gəlirlərindən asılılığın azaldılması üçün yeni bazarlara çıxış həlledici əhəmiyyət daşıyır.
Azpost.info bildirir ki, hazırda Azərbaycanın əsas ixrac tərəfdaşları arasında Rusiya, Türkiyə, Gürcüstan və Mərkəzi Asiya ölkələri yer alır. Xüsusilə Bakı-Tbilisi-Qars dəmir yolu və Ələt Beynəlxalq Dəniz Ticarət Limanı Azərbaycan məhsullarının Avropa və Asiya bazarlarına çıxışını asanlaşdırıb.
İqtisadçı Vüqar Bayramovun fikrincə, Azərbaycanın tranzit imkanları yerli istehsalçılar üçün əlavə üstünlük yaradır: “Orta Dəhliz layihəsinin inkişafı Azərbaycanı regionun əsas logistika mərkəzlərindən birinə çevirə bilər.”
Ekspertlər hesab edirlər ki, fındıq, meyvə-tərəvəz, şərabçılıq məhsulları, kimya sənayesi və tikinti materialları üzrə ixrac potensialı daha yüksəkdir.
Xüsusilə Qazaxıstan, Özbəkistan və Birləşmiş Ərəb Əmirlikləri Azərbaycan istehsalçıları üçün perspektivli bazarlar hesab edilir. Analitiklər bildirirlər ki, yaxın illərdə ixracın coğrafiyasının genişlənməsi iqtisadi artımın əsas mənbələrindən biri olacaq.
S.Abdulla
