Rusiyanın Azərbaycanla bağlı media və sosial şəbəkələrində mənfi informasiya fonu yaranıb.
Azpost.info bildirir ki, bu barədə Azərbaycanın Rusiyadakı səfiri Rəhman Mustafayev “Lenta.ru”ya müsahibəsində bildirib.
“Əlbəttə, müsbət məqamlarla yanaşı, mənfi məqamlar da ortaya çıxır, ziddiyyətlər yaranır. Bəzi rusiyalı ekspertlərin, bloqerlərin və jurnalistlərin Azərbaycanla bağlı yaratdığı mənfi informasiya fonunu qeyd etməyə məcburam”, – deyə o bildirib.
Mustafayevin sözlərinə görə, Bakı Azərbaycanın ünvanına səsləndirilən və respublika hakimiyyətinin fikrincə, iki ölkə arasında strateji tərəfdaşlıq və müttəfiqlik münasibətlərinə zərər vuran bir sıra fikirlərlə bağlı Moskvanın diqqətini çəkib.
O, həmçinin Rusiyanı vəziyyətin düzəldilməsi üçün “prinsipial reaksiya” göstərməyə və konkret addımlar atmağa çağırıb.
Səfir qeyd edib ki, Bakının Ukrayna böhranına münasibətdə mövqeyi dəyişməz olaraq qalır. Onun sözlərinə görə, “Azərbaycan dövlətlərin suverenliyi, ərazi bütövlüyü və sərhədlərinin toxunulmazlığı prinsiplərini qətiyyətlə və ardıcıl şəkildə dəstəkləyir”.
Bununla yanaşı, səfir əlavə edib ki, Moskva ilə Bakı arasında ikitərəfli münasibətlərdəki böhranın kəskin mərhələsi artıq geridə qalıb.
