Bal bir çox insan üçün şəkərin daha sağlam əvəzi hesab olunur və gündəlik qidalanmada geniş istifadə edilir.
AzPost Sports.kz-ə istinadən xəbər verir ki, allergoloq-immunoloqlar baldan düzgün istifadə edilmədikdə onun faydadan çox zərər verə biləcəyini bildirirlər.
Mütəxəssislərin sözlərinə görə, balın əsas təhlükəsi onun həddindən artıq qəbul edilməsidir. Bal yüksək kalorili məhsuldur və tərkibində sürətli karbohidratlar çoxdur. Bu isə şəkərin qanda sürətlə qalxmasına, maddələr mübadiləsinin pozulmasına və çəki artımına səbəb ola bilər.
Həkimlər baldan istifadə zamanı ilk qayda olaraq onun qızdırılmamasını tövsiyə edirlər. Qaynar çaya və ya südə əlavə edilən bal 40 dərəcədən yuxarı temperaturda öz faydalı maddələrinin böyük hissəsini itirir.
İkinci mühüm məqam gündəlik miqdardır. İmmunitetin dəstəklənməsi üçün gündə cəmi bir çay qaşığı bal kifayət sayılır.
Balın əsas yeməklərlə birlikdə yeyilməsi də arzuolunan deyil. Mütəxəssislər onu səhər acqarına və ya yeməkdən təxminən bir saat sonra qəbul etməyi daha məqsədəuyğun hesab edirlər.
Eyni zamanda, balın şəkəri tam əvəz etməsi də doğru yanaşma sayılmır. Xüsusilə maddələr mübadiləsi problemləri olan və allergiyaya meyilli insanlar baldan ehtiyatla istifadə etməlidir.
Qış aylarında isə qaynadılmamış, ilıq halda hazırlanan bal əsaslı içkilərin orqanizmə müsbət təsir göstərə biləcəyi qeyd olunur. Bu cür içkilərin maddələr mübadiləsini dəstəklədiyi və iltihabi proseslərin azalmasına kömək etdiyi bildirilir.
Mütəxəssislər vurğulayır ki, bal sadəcə şirniyyat deyil, düzgün istifadə edildikdə funksional qida məhsuludur. Onun faydası yalnız ölçülü və şüurlu qəbul edildiyi zaman ortaya çıxır.
