Səhər saatlarında bank kartından istifadə edilmədən xarici valyutada kiçik məbləğlərin silinməsi cəhdi daha bir istifadəçini çətin vəziyyətə salıb. AzPostxəbər verir ki, 01 mart saat 06:12 radələrində Leobank kartından ard-arda 0.16 və iki dəfə 0.46 ABŞ dolları məbləğində ödəniş cəhdi barədə bildiriş gəlib. Bildirişlərdə əməliyyat ünvanı kimi TikTok göstərilib.
İstifadəçi qeyd edir ki, platformada yalnız video izləyir və heç vaxt kart məlumatlarını hər hansı xidmətə daxil etməyib. Onun sözlərinə görə, əməliyyatlar uğursuz alınıb və kart avtomatik olaraq bloklanıb. Bir saat sonra bankla əlaqə saxlayan vətəndaşa bildirilib ki, guya hansısa musiqi platformasına “abunə” qeydə alınıb, lakin təhlükəsizlik zəifliyinin necə baş verdiyi barədə aydın izah verilməyib. Kartın blokdan çıxarılmasının mümkün olmadığı, yeni kart sifariş edilməli olduğu bildirilib.
Kiçik məbləğli test əməliyyatları nədir?
Mütəxəssislər bildirirlər ki, bu cür 0.10–1 dollar arası əməliyyatlar çox vaxt kart məlumatlarının sızdırılıb-sızdırılmadığını yoxlamaq üçün istifadə olunur. Fırıldaqçılar əvvəlcə kiçik məbləğlə “test” edir, əməliyyat keçərsə, daha böyük məbləğlər silinməyə cəhd göstərilir. Bu üsul xüsusilə onlayn platformalar və abunə əsaslı xidmətlər üzərindən həyata keçirilir.
Kart məlumatlarının ələ keçirilməsi müxtəlif yollarla baş verə bilər:
-
Şübhəli saytlarda ödəniş edərkən,
-
Zərərli tətbiqlər vasitəsilə,
-
Məlumat bazalarının sızması nəticəsində,
-
Fişinq (saxta link) hücumları ilə.
Bankların reaksiyası və istifadəçi məsuliyyəti
Rəqəmsal bankçılıq sahəsində fəaliyyət göstərən qurumlar təhlükəli əməliyyatları aşkar etdikdə kartı avtomatik bloklayır. Bu addım vəsaitin qorunması məqsədi daşısa da, istifadəçilər üçün əlavə vaxt və prosedur itkisinə səbəb olur. Ekspertlər hesab edir ki, banklar müştərilərə əməliyyatın mənbəyi və mümkün risk barədə daha detallı məlumat təqdim etməlidirlər.
Belə hallarda nə etməli?
Mütəxəssislər aşağıdakı addımları tövsiyə edir:
-
Kartı dərhal bloklamaq.
-
Bankla rəsmi müraciət qeydə almaq.
-
Onlayn hesabların parollarını dəyişmək.
-
İki mərhələli təsdiqi aktivləşdirmək.
-
Kart məlumatlarını heç bir şübhəli linkdə daxil etməmək.
