“Belarus hakimiyyəti Rusiyanın öz ərazisində taktiki nüvə silahı yerləşdirməsini təsdiq edərsə, cavab verməli olacaq”.
Azpost.info xəbər verir ki, bunu Brüsseldə keçirilən mətbuat konfransında Aİ Xarici İşlər Xidmətinin nümayəndəsi Piter Stano bildirib.
“Biz Belarusdan təsdiq görməmişik. Əgər bu baş verərsə, təbii ki, nəticələri olacaq. Bu, eskalasiya və Avropanın təhlükəsizliyinə təhdid deməkdir və cavabsız qalmayacaq”, – Stano deyib.
Rusiya prezidenti Vladimir Putin şənbə günü bildirib ki, Rusiya iyulun 1-də Belarusda taktiki nüvə silahları üçün xüsusi anbarın tikintisini başa çatdırır. Onun sözlərinə görə, Rusiya artıq Belarusa nüvə silahının daşıyıcısı ola biləcək “İsgəndər” kompleksini təhvil verib.
Putin onu da qeyd edib ki, Belarus prezidenti Aleksandr Lukaşenko Rusiyanın taktiki nüvə silahlarının Belarusda yerləşdirilməsi məsələsini çoxdan qaldırıb.
“ABŞ bunu çoxdan bir sıra ölkələrdə yerləşdirib, ona görə də Belarusun tələbində qeyri-adi heç nə yoxdur”, – Putin bildirib.
Azpost.info
