İsveçrənin məşhur Zermatt kurortu yaxınlığında beş turistin meyiti aşkarlanıb. AzPost xəbər verir ki, hadisə Rimpfischhorn zirvəsi yaxınlığında baş verib və hazırda hüquq-mühafizə orqanları araşdırma aparır.
İsveçrə polisi bildirir ki, itkin düşmüş alpinistlərlə bağlı məlumat aldıqdan sonra əraziyə helikopter göndərilib. Axtarış nəticəsində beş nəfərin cəsədi tapılıb. Qurbanların şəxsiyyəti hələlik müəyyən edilməyib.
“Air Zermatt” xilasetmə xidməti hadisənin təfərrüatlarını açıqlayaraq bildirib ki, təxminən dörd min metr yüksəklikdə tərk edilmiş xizəklər müşahidə olunub. Uçqun riski olan ərazidə aparılan əməliyyat nəticəsində üç nəfərin meyiti qar kütləsi altında, daha iki nəfər isə azca aşağıda tapılıb.
Rimpfischhorn dağı 4199 metr hündürlüyü ilə ekstremal xizəkçilər arasında populyardır. Yerli media bu faciənin bir ay əvvəl bölgədə yağan intensiv qar və uçqun təhlükəsi ilə əlaqəli ola biləcəyini yazır.
Xilasedicilər əlavə ediblər ki, hadisədən öncə bölgədə daha bir xilasetmə əməliyyatı zamanı güclü külək və duman səbəbilə alpinistlər təxliyə oluna bilməyib və yalnız altı saat sonra xilas ediliblər.
Zermatt son həftələrdə yolların bağlanması və əlverişsiz hava şəraiti ilə diqqət mərkəzinə düşüb. Məşhur Matterhorn mənzərələri ilə tanınan region hazırda alpinistlər üçün yüksək riskli zona hesab olunur.
