Birmarket
Alıcı Birmarket onlayn ticarət platformasından aldığı Hoffmann markalı doğrayıcının keyfiyyətindən ciddi narazılıq edib.
Şikayətçi AzPost-a bildirib ki, məhsul ona zədələnmiş qutuda çatdırılıb. Onun sözlərinə görə, qutunun vəziyyəti elə olub ki, sanki “zibil qutusundan tapılıb” və məhsul ora yerləşdirilərək göndərilib.
Müştəri əvvəlcə cihazı yoxlamaq üçün soğan doğrayıb və doğrayıcının işlədiyini görüb. Lakin ikinci dəfə quyruq və tikə ət doğramağa çalışarkən cihaz tüstülənərək sıradan çıxıb.
“Satıcıya yazdım ki, ya məhsulu dəyişdirsinlər, ya da pulu geri qaytarsınlar. Amma artıq 12 gündür heç kim maraqlanmır, nə zəng var, nə cavab”, – deyə alıcı qeyd edib.
O, şirkətin müştəri xidmətlərinin zəif işlədiyini və vətəndaşların müraciətlərinə reaksiya verilmədiyini bildirib.
Qeyd edək ki, Birmarket son aylarda bəzi alıcılar tərəfindən çatdırılma və keyfiyyət problemləri ilə bağlı sosial şəbəkələrdə də tənqid olunur.
