Yaddaşımda, vaxtilə Azərbaycan Televiziyasında yayımlanan “Ocaq” verilişinin müəllifi və aparıcısı kimi qalan, Əməkdar jurnalist Zakir Abbasla tanışlığımın tarixi çox da uzaq deyil.
25 il öncə, günlərin birində Əməkdar mədəniyyət işçisi, mərhum Maarif Teymur iş yerimə təşrif buyurmuşdu. Hal-əhval tutduqdan sonra o, mənə gətirdiyi kitabı təqdim etdi – Zakir Abbas “Kənar adam”. Maarif müəllim təklif etdi ki, bu kitabın təqdimatını Masallıda keçirək. Dedim ki, mən kitabla tanış olandan sonra fikrimi deyərəm. Elə də oldu. Kitabın bədii ideyası, mövzunun aktuallığı məni necə tutdusa, üç gün keçməmiş razılığımı bildirdim və oxucuların iştirakı ilə təqdimat baş tutdu.
Müəllifin təkcə bu kitabını deyil, digər əsərlərini – mətbuatda dərc edilən publisistik yazılarını, sanballı məqalələrini oxuduqca, yaradıcılıq nailiyyətlərini izlədikcə bu dəyərli yazıçı, istedadlı jurnalistlə tanışlığımdan məmnun qaldım. Həmyerli kimi ara-sıra görüşlərimiz bizi bir-birimizə daha da yaxınlaşdırdı. İllər keçdikcə səmimi münasibətimiz dostluğa çevrildi.
Zakir Abbas dostluqda sədaqətlidir. Kiminlə dostluq edirsə aradakı isti münasibətləri qoruyub saxlamağa, güvənə biləcəyi, bölüşə biləcəyi insanı itirməməyə çalışır.
Hamıyla mehriban, səmimi münasibət saxlayır. Hətta ona qarşı haqsızlıq edənləri də heç nə olmamış kimi bağışlaya bilir.
Zakir Abbas milli-mənəvi dəyərlərimizin, çoxəsrlik mədəniyyətimizin, şifahi xalq ədəbiyyatımızın təbliğinə böyük önəm verib.
İctimai-sosial mövqeyindən asılı olmayaraq onun oxucuları, dinləyiciləri bu maarifpərvər insanın yaradıcılığına, şəxsiyyətinə həmişə rəğbətlə yanaşıb. . Məhz bunun nəticəsidir ki, Zakir Abbas haqqında görkəmli ədəbiyyatşünaslar, sənətşünas alimlər, qələm dostları hər zaman yüksək fikirlər yazıblar.
Vaxta qarşı çox diqqətlidir, ötən hər bir andan səmərəli, məqsədəuyğun istifadə etməyə üstünlük verir. Yazıçı-publisist, jurnalist kimi bu gün də yorulmadan çalışan Zakir Abbas onlarla məşhur dünya yazıçılarının əsərlərini dilimizə tərcümə edib. Bu, onun yaradıclığının mühüm istiqamətlərindən biridir.
Hazırda çalışdığı Azərbaycan Dövlət Mədəniyyət və İncəsənət Universitetində tələbələrin ən çox sevdiyi müəllimlərdəndir Zakir Abbas. Hətta, onların ən yaxın dostu, sirdaşıdır desək, yanılmarıq. Çünki, çətin anda tələbələrinin müraciətlərini cavabsız qoymur, əlindən gələn köməyi əsirgəmir. Xatirimdədir, tanıdığım bir valideyn övladının hansısa fənnən qiymətinin aşağı salındığından gileyləndi. Mən bu barədə Zakir müəllimlə danışanda bildirdi ki, belə hallar nadir halda olur. Hər müəllim istər ki, dərs dediyi tələbə çalışıb yüksək qiymət alsın… amma yenə də maraqlanaram. O, həmin tələbəni imtahan götürən müəllimin yanına apardı və kafedra müdirinin iştirakı ilə keçirilən imtahandan tələbə öz obyektiv qiymətini aldı.
Zakir Abbas məlumatlı və maraqlı həmsöhbətdir. Odur ki, hamı onunla ünsiyyətdə olmaq istəyir, fikir mübadiləsi aparmaqdan yorulmursan, əksinə böyük zövq alırsan.
Zakir müəllimi dini- fəlsəfi mövzular çox maraqlandırır. O, “Kənar adam” kitabının titul səhifəsində belə bir fikir yazıb:-“Mən dindar deyiləm, Allah adamıyam”. Və tədqiqat xarakterli yazılarında bu fikri əsaslandırmağa çalışır. “Təsəvvüf-ilahi sirləri dərk etmək məqamıdır”, “Peyğəmbərlər din yaratmır”, “Məhəmməd peyğəmbər dini tolerantlığın banisidir” və mərhum böyük din alimi Şeyx Məhəmmədlə apardığı müsahibəni oxuyandan sonra Zakir Abbasın dini-fəlsəfi görüşünə rəğbətlə yanaşmalı olursan.
Yazılarının birində xalq yaradıcılığı və muğamın tarixi kökünə bələd olan Zakir müəllim muğamı musiqi janrı kimi deyil, fəlsəfi konsepsiya (cərəyan) kimi səciyyələndirir və bunu dolğun, əhatəli şəkildə təhlil edir. Bəzən mənə elə gəlir ki, bu insanın dünyadan heç bir umacağı yoxdur. Onun üçün yaxşı adam, pis adam anlayışı da yoxdur, aqil və nadan, köklü və köksüz isan var.
Mən sadə, səmimi təvazökar dostumu- Zakir müəllimi yubileyi münasibətilə təbrik edir, ona möhkəm cansağlığı və fəaliyyətində uğurlar arzulayıram.
Ayiq SƏMƏDOV
Dini Qurumlarla İş üzrə Dövlət Komitəsi Masallı bölgəsi üzrə şöbəsinin əməkdaşı.
