Portağal şirəsi illərdir sağlam səhər içkisi kimi təqdim olunsa da, yeni araşdırma bu içkinin təhlükəli tərəfini ortaya çıxarıb. AzPost bildirir ki, Brigham Young Universitetinin alimləri portağal şirəsi və digər şirinləşdirilmiş içkilərin diabet riskini artırdığını sübut ediblər.
Advances in Nutrition jurnalında dərc olunan tədqiqatda qeyd edilir ki, gündəlik bir stəkan portağal şirəsi 2-ci tip diabet riskini 5 faiz artırır. Tədqiqatçılar bildiriblər ki, meyvə və bal kimi təbii şəkər mənbələri bu riski artırmır, əksinə bəzən azaldır.
Alimlər 800 mindən çox insanın iştirak etdiyi 29 ayrı kohort tədqiqatını təhlil ediblər. Məlum olub ki, meyvə şirəsi və qazlı içkilər orqanizmdə qlükozanın sürətli yığılmasına səbəb olur və bu, vaxt keçdikcə diabet xəstəliyinə zəmin yaradır.
Bir stəkan portağal şirəsi qadınlar üçün gündəlik şəkər normasının demək olar ki, tamamını təşkil edir. Amerika Ürək Assosiasiyası kişilər üçün 36 qram, qadınlar üçün isə 25 qramdan artıq şəkər qəbulunu tövsiyə etmir.
Meyvə şirələri, görünən sağlamlıq faydalarına baxmayaraq, əlavə şəkər və əlavələrlə zəngindir. Bundan əlavə, şirələrdə orqanizmin toxluq hissini təmin edən və bağırsaq sağlamlığı üçün vacib olan lif olmur.
Mütəxəssislər bildirirlər ki, bütöv meyvələr yemək həm maddələr mübadiləsini yaxşılaşdırır, həm də diabet riskini azaldır. Meyvələrin qabığı və pulpası isə orqanizm üçün əvəzolunmaz vitamin və antioksidant mənbəyidir.
Araşdırmanın müəllifi Dr. Karen Della Corte bildirib ki, içkilərdəki şəkər, istər soda, istərsə də meyvə şirəsi olsun, diabet və digər xroniki xəstəliklərin yaranmasına səbəb ola bilər. O, gələcək pəhriz qaydalarında şəkərin mənbəyinə və formasına xüsusi diqqət yetirilməsinin vacibliyini vurğulayıb.
