Azərbaycanda fəaliyyət göstərən bank olmayan kredit təşkilatlarından (BOKT) biri olan “İdeal Kredit”in müştərisi ciddi problemlə üzləşib. Söhbət cəmi 14 qəpiklik borca görə vətəndaşın kredit tarixçəsinin (Mərkəzi Kredit Reyestri məlumatlarının) zədələnməsindən gedir.
AzPost xəbər verir ki, bu barədə şikayətçi Elmar Mənsumov sosial şəbəkələrdə məlumat paylaşıb.
“Nə zəng etdilər, nə də SMS göndərdilər”
Şikayətçinin sözlərinə görə, o, 6 aylıq mebel kreditini hər ay qrafik üzrə vaxtında ödəyib. Son ödəniş zamanı sistemdə görünən məbləği tam şəkildə ödəsə də, sonradan hesabında 14 qəpiklik qalıq borc yaranıb. Ən qəribə məqam isə odur ki, qurum bu barədə müştəriyə heç bir məlumat verməyib:
“Bu barədə mənə nə bir SMS, nə bir zəng, nə də bildiriş gəldi. Nəticədə, cəmi 14 qəpiyə görə adıma 31 gün gecikmə yazılıb. Mən bunu təsadüfən Findoc-dan gələn e-mail vasitəsilə öyrənmişəm. Hazırda bu süni gecikmə səbəbindən digər bank müraciətlərimdə ciddi problemlər yaşayıram” – deyə E. Mənsumov bildirib.
“Müştərini iki həftədir yola verirlər”
Vətəndaş qeyd edir ki, yaranmış texniki səhvə görə 2 həftədir hər gün kredit təşkilatına müraciət etsə də, heç bir nəticə yoxdur:
“Artıq 2 həftədir hər gün zəng edirəm. Başa düşürəm ki, sistemi bəlkə dəyişə bilməzlər, ona görə də onlardan heç olmasa rəsmi arayış istəyirəm. Bildirsinlər ki, bu gecikmə müştəridən asılı olmayan texniki səbəbdən yaranıb. Amma sadəcə yola verirlər, konkret həll yoxdur”.
Şikayətçi bir neçə aktual sualı gündəmə gətirib:
-
Müştəriyə borc barədə niyə məlumat verilmir?
-
14 qəpik kimi kiçik məbləğə görə dərhal niyə “qara siyahı” formalaşdırılır?
-
Vaxtlı-vaxtında ödəniş edən müştərinin kredit tarixçəsini zədələmək niyə bu qədər asandır?
Qeyd edək ki, şikayətçi məsələ ilə bağlı artıq Azərbaycan Respublikasının Mərkəzi Bankına da rəsmi şikayət ünvanlayıb. Ekspertlər bildirir ki, bu növ kiçik qalıq borclar çox vaxt sistemlərdəki yuvarlaqlaşdırma və ya komissiya hesablamaları zamanı yaranır və maliyyə qurumları bu barədə müştərini dərhal xəbərdar etməyə borcludurlar.
Redaksiyadan: Qarşı tərəfin də mövqeyini dərc etməyə hazırıq.
