Pekin İsraillə Fələstin tərəfi arasında sülh danışıqlarının bərpası üçün rahat şərait yaratmağa hazırdır.
Azpost.info xəbər verir ki, bu bəyanatla Çin xarici işlər naziri Qin Qanq çıxış edib.
Çinin “Sinxua” xəbər agentliyinin məlumatına görə, İsrailin xarici işlər naziri Eli Koen ilə telefon danışığı zamanı Qin Qanq Çinin Fələstin-İsrail münasibətlərindəki hazırkı gərginlikdən narahatlığına diqqət çəkib və vurğulayıb ki, hazırda əsas məsələ münaqişənin nəzarətdən çıxmasının və genişlənməsinin qarşısını almaqdır.
Eyni zamanda, Çin XİN rəhbəri deyib ki, çıxış yolu sülh danışıqlarının bərpası və iki xalq üçün iki dövlət prinsipinin həyata keçirilməsidir.
Koen də öz növbəsində Qin Qanqa təşəkkür edib. O, İsrailin gərginliyi soyutmağa çalışdığını desə də problemin qısa müddətdə həll olunmayacağına işarə edib.
Hazırda Çin özünü beynəlxalq münaqişələrdə vasitəçi kimi göstərməyə çalışır. Xatırladaq ki, mart ayında regional güclər İran və Səudiyyə Ərəbistanı arasında diplomatik münasibətlərin bərpasına məhz Pekin vasitəçilik edib.
Azpost.info
