Çin Putinin “Sibir Gücü – 2” sazişi ilə bağlı dediklərini təsdiqləməyib, sövdələşmələr hələ davam edir.
AzPost-un məlumatına görə, “The Washington Post” yazır ki, Putinin ölkəyə səfərindən sonra hazırlanan yekun kommünikedə Çin yalnız Rusiya və Monqolustanla birgə öz transsərhəd infrastrukturu və enerji layihələrini fəal şəkildə təşviq edəcəyini vəd edib.
Financial Times yazır ki, Çin hakimiyyəti də layihənin inkişafını təsdiqləyən hər hansı ayrıca açıqlama verməyib. Çin dövlət mediasında Putinin səfərinin nəticələrini işıqlandıran məqalələrdə “Sibir Gücü – 2″dən bəhs edilməyib.
Putin Çinə səfərinin son günündə keçirdiyi mətbuat konfransında “Sibir Gücü – 2” sazişinin imzalandığını açıqlayıb. Onun sözlərinə görə, tərəflər əsas məsələlər, o cümlədən Rusiyadan alınan qazın qiyməti ilə bağlı konsensus əldə ediblər. Eyni zamanda, Putin bu qiyməti bugünkü qiymətlərə görə deyil, müəyyən formulla qiymətləndirib.
Karnegi Rusiya Avrasiya Mərkəzinin direktoru Aleksandr Qabuev FT-yə müsahibəsində qeyd edib ki, Rusiya və Çin tərəfindən imzalanacağını elan olunan qaz kəmərinin tikintisinə dair “hüquqi məcburi memorandum” əslində layihə ilə bağlı yalnız ümumi müddəaları ehtiva edir və qiymət və vaxt kimi məsələləri əhatə etmir. Onun fikrincə, Pekin bu sənədi imzalamaqla Moskvaya yalnız sövdələşmədə maraqlı olduğunu, lakin özü üçün daha da əlverişli şərtlərə nail olmaq istədiyini göstərir.
Eynilə, Çin Enerji Təhlükəsizliyi İnstitutunun sədri Viktor Qao da FT-yə müsahibəsində Rusiyanın bəyanatlarından danışıb. O, belə bəyanatları “vaxtından əvvəl” adlandırıb. Ekspert memorandumun imzalanmasını artıq əldə edilmiş razılaşmadan daha çox “niyyətlər indikatoru” adlandırıb.
