Amerikanın The Coca-Cola Company şirkəti bu ilin oktyabrında Rusiyada öz məşhur ticarət nişanını itirmək təhlükəsi ilə üz-üzə qala bilər. AzPost xəbər verir ki, məlumatı TASS yayıb.
Rusiya Federal Əqli Mülkiyyət Xidmətinin (Rospatent) açıqlamasına görə, “Coca-Cola” brendinə dair ilk müraciət 1936-cı ilin dekabrında qəbul olunub və bu qeydiyyatın müddəti 2025-ci il oktyabrın 31-də başa çatır. Söhbət Beynəlxalq Mal və Xidmətlərin Təsnifatı üzrə yalnız bir sinif – qidalandırıcı və tonuslandırıcı içkilər kateqoriyası üzrə qeydiyyatdan gedir.
Şirkət əvvəllər dəfələrlə Rusiyada ticarət nişanını yenidən qeydiyyatdan keçirərək hüququnu uzadıb. Lakin hazırkı qeydiyyat müddətinin uzadılıb-uzadılmayacağı hələlik məlum deyil.
Xatırladaq ki, bu ilin fevralında Coca-Cola-nın Rusiyaya qayıtmaq niyyətində olduğu barədə xəbərlər yayılmışdı.
Digər tərəfdən, ABŞ Prezidenti Donald Tramp Coca-Cola-nın daxili bazarda istehsal reseptinin dəyişdirilməsinə nail olub. Yeni qərara əsasən, şirkət yüksək fruktoza tərkibli qarğıdalı şərbətini təbii qamış şəkəri ilə əvəz etməyi qəbul edib.
