Son dövrlər telefon fırıldaqları daha da artıb və bir çox insan etibarsız zənglərə inanaraq tələyə düşür.
AzPost xəbər verir ki, informasiya təhlükəsizliyi sahəsində tanınmış mütəxəssis Nataliya Kasperskaya təhlükəli zəngləri ayırd etməyə imkan verən əsas məqama diqqət çəkib.
Onun sözlərinə görə, özünü dövlət qurumu, rəsmi təşkilat və ya hansısa “səlahiyyətli şəxs” kimi təqdim edən və qarşı tərəfdən təcili addımlar atmağı tələb edən zənglər ciddi şübhə doğurmalıdır.
Ekspert bildirib ki, real dövlət və rəsmi qurumlar vətəndaşlara telefonla zəng edərək onlardan dərhal hərəkət etməyi, məlumat paylaşmağı və ya ödəniş etməyi istəmirlər.
Nataliya Kasperskaya vurğulayıb ki, tələskənlik və qorxu yaratmaq fırıldaqçıların ən çox istifadə etdiyi psixoloji üsullardandır. Məhz bu cür zənglər zamanı insanlardan şəxsi məlumatlar, bank kartı detalları və ya təsdiq kodları tələb olunur.
Mütəxəssis vətəndaşlara bu cür hallarda zəngi dərhal dayandırmağı, məlumat paylaşmamağı və şübhəli situasiyalarda rəsmi qurumlarla birbaşa əlaqə saxlamağı tövsiyə edib. Onun fikrincə, diqqətli olmaq və tələsməmək fırıldaqçıların qurbanına çevrilməməyin ən effektiv yoludur.
