Rusiyanın xarici işlər nazirinin müavini Andrey Rudenko TASS-a müsahibəsində Qarabağ ətrafında vəziyyətə və bütövlükdə regionda vəziyyətə toxunub.
O, ATƏT-in Minsk Qrupunun nizamlanmada iştirakı perspektivləri barədə suala cavab verərkən deyib ki, Minsk Qrupu həmsədrlərinin fəaliyyəti davam etdirilməlidir: “Onlar Dağlıq Qarabağ münaqişəsinin nizamlanmasının baza prinsiplərinin işlənməsinə mühüm töhfə veriblər, onların bir çoxu 9 noyabr 2020-ci il tarixli bəyanatında öz əksini tapıb. Bu, Dağlıq Qarabağ ətrafında yerləşən rayonların Azərbaycana qaytarılmasına, qaçqınların geri qaytarılmasına, Dağlıq Qarabağı Ermənistanla birləşdirən dəhlizin saxlanmasına, təhlükəsizliyin təminatına, sülhyaratma əməliyyatına, regionda bütün iqtisadi və nəqliyyat əlaqələrinin açılmasına aiddir”, – o qeyd edib.
Nazir müavininin sözlərinə görə, hələlik hərtərəfli siyasi nizamlanma əldə edilməyib: “Minsk Qrupu “gələcək addımlara, o cümlədən status məsələsinə qarşılıqlı məqbul yanaşmaların işlənib hazırlanmasında faydalı ola bilər. Amma ehtiyatlı tərpənərək, tələsmədən, vaxt gələndə”.
Hazırda ATƏT-in Minsk Qrupu ermənilərlə azərbaycanlılar arasında inam tədbirlərinin möhkəmləndirilməsinə, vətəndaş cəmiyyəti çərçivəsində dialoqun inkişafına kömək edə bilər ki, bu da vəziyyətin ümumilikdə sağlamlaşdırılmasına, gələcək addımlar üçün zəmin yaradılmasına xidmət edə bilər, diplomat deyib. (Turan)
