Danimarkanın Mədəniyyət Nazirliyi vətəndaşların görünüşünü və səslərini müəllif hüquqları ilə qorumağı nəzərdə tutan yeni qanun layihəsi təqdim edib.
Bu qanun “deepfake” texnologiyalarına qarşı mübarizədə əhəmiyyətli addım olacaq. Təklif edilən qanun şəxslərin razılığı olmadan onların siması və ya səsindən istifadə edilməsini qadağan edir və bu hallarda təzminat tələb etmək hüququ verir. Qanun satira və parodiyalara şamil edilməyəcək, lakin xüsusilə sənətçilərin çıxışlarında deepfake istifadəsini yasaqlayacaq.
Layihəyə əsasən, deepfake materialları silməyən platformalara qarşı cərimələr nəzərdə tutulur. Qanun yalnız Danimarka ərazisində qüvvədə olacaq və parlamentin 90%-ə qədər dəstəyi ilə qəbul ediləcəyi gözlənilir.
Bu təşəbbüs, Danimarka Baş nazirinin saxta videosunun yayılması və pornoqrafik deepfake yaradıcılarına qarşı məhkəmə cəhdlərindən sonra gündəmə gəlib.
Qeyd edək ki, Danimarka bu sahədə belə qanunu qəbul edən ilk ölkə olacaq. Bu, həm də texnologiyanın etik istifadəsi ilə bağlı Avropada geniş müzakirələrin başlama nöqtəsi kimi qiymətləndirilir.
