Fransada baş verən qəribə hadisə sərnişinlərin yaddaşında uzun müddət qalacaq.
AzPost xəbər verir ki, Paris–Korsika reysi ilə hərəkət edən Air Corsica aviaşirkətinə məxsus təyyarə Orli hava limanından Ajaccioya uçarkən, eniş üçün ayrılmış zolağın işıqları yandırılmadığına görə 18 dəqiqə ərzində Aralıq dənizi üzərində dövrə vurmağa məcbur olub.
Məlum olub ki, uçuşu qəbul etməli olan yeganə dispetçer gecikən reysi gözlədiyi üçün qüllədə tək qalıb və yuxuya gedib. O, eniş zolağının işıqlandırma sistemini işə sala bilmədiyindən pilot enişi təxirə salaraq təyyarəni havada saxlayıb.
Hadisə zamanı hava limanının yanğınsöndürmə xidməti dəfələrlə dispetçerlə əlaqə yaratmağa çalışsa da, nəticə əldə edilməyib. Nəticədə polis əməkdaşları qülləyə qalxaraq yatan dispetçeri oyadıb.
Təyyarənin kapitanı bildirib ki, karyerası ərzində belə vəziyyətlə ilk dəfə qarşılaşır. O, sərnişinlərin panikaya düşmədiyini və hadisəni yumorla qarşıladıqlarını da qeyd edib.
Qeyd edək ki, bu, oxşar ilk hadisə deyil. Keçən il Avstraliyanın Brisben şəhərində də bir dispetçer ardıcıl yeddi gecə növbəsindən sonra idarəetmə paneli arxasında yuxuya getmişdi.
