Yer kürəsinə yaxınlaşan nəhəng kosmik obyekt – 2025 FA22 adlı asteroid təhlükəsiz şəkildə planetimizi yan keçib.
AzPost xəbər verir ki, alimlərin hesablamalarına görə, asteroidin uzunluğu təxminən 290 metr olub və o, Yerlə maksimal yaxınlaşma anında Ayın məsafəsinə bərabər uzaqlıqdan keçib.
Mütəxəssislərin məlumatına əsasən, bu asteroidin kütləsi Çelyabinsk meteoritindən min dəfə böyükdür. Bu səbəbdən o, NASA və digər beynəlxalq qurumların siyahısında “potensial təhlükəli obyekt” kimi qeyd olunub.
Bununla belə, alimlər əvvəlcədən ehtimal edirdilər ki, 2025 FA22-nin Yer ilə toqquşma riski real deyil. Uçuş müşahidə edilən anda da bu proqnoz öz təsdiqini tapıb.
Kosmos üzrə tədqiqatçılar bildiriblər ki, bu cür müşahidələr gələcəkdə planetimizi təhlükə altına sala biləcək digər göy cisimlərini vaxtında izləmək üçün vacibdir. Onların fikrincə, Yerin kosmik müdafiəsi sahəsində aparılan işlər daha da gücləndirilməlidir.
