Macarıstanlı alimlər müəyyən ediblər ki, bir çox bitki və heyvanlarda təbii şəkildə mövcud olan dimetiltriptamin (DMT) maddəsi insultdan sonra beynin zədələnmə səviyyəsini əhəmiyyətli dərəcədə azalda bilər. AzPost xəbər verir ki, araşdırma Science Advances jurnalında dərc olunub.
Tədqiqatçılar bildirirlər ki, DMT həm laboratoriya şəraitində, həm də heyvanlar üzərində aparılan sınaqlarda yüksək effektivlik göstərib. İnsult keçirən siçovullarda bu maddə ilə müalicə nəticəsində beyin toxumasındakı zədələnmə və şişkinlik xeyli azalıb.
Alimlərin sözlərinə görə, DMT-nin əsas təsir mexanizmi beynin qoruyucu baryeri sayılan qematoensefalik baryerin bütövlüyünü bərpa etməkdir. Bu baryer zədələnəndə iltihab və hüceyrə itkisi artır, lakin DMT bu prosesi zəiflədir və beyin toxumasını qoruyur.
Maddə eyni zamanda iltihab yaradan molekulların yaranmasını azaldır və beynin immun hüceyrələrinin həddindən artıq aktivləşməsinin qarşısını alır. Bu təsirlər birlikdə beyin zədələnməsinin miqyasını azaldır və sağalma prosesini sürətləndirir.
Hazırda DMT maddəsinin insanlarda insultdan sonra beyin funksiyalarının bərpasına təsirini qiymətləndirmək üçün klinik sınaqlar davam edir. Alimlər ümid edirlər ki, bu təbii birləşmə gələcəkdə insult müalicəsində yeni bir mərhələ başlada bilər.
