“Qanunvericilikdə VÖEN-lə çalışanların DSMF-yə ödənişlərinin minimum əmək haqqına bağlı olması aradan qaldırılmalıdır”.
Azpost bildirir ki, bu sözləri iqtisadçı ekspert Natiq Cəfərli minimum maaş və pensiyaların artıması ilə bağlı məlumatı şərh edərkən deyib.
“Bu, minimum əmək haqqının 136 manat olduğu zaman qanuna salınmışdı. İndi isə minimum əmək haqqı 400 manat oldu. Deməli, VÖEN-lə çalışan 700-800 min vətəndaşın vergi yükü avtomatik olaraq artdı. 2025-ci ildən DSMF və icbari tibbi sığortaya 116 manat ödəməli olacaqlar. Bu zərərli və yanlış qanundur, mütləq dəyişməlidir, çünki, minimum maaş artan kimi onun 25%-i (ortalama) DSMF-yə ödənilir”- deyə ekspert bildirib.
N.Cəfərli həmçinin qeyd edib ki, digər bir qanunla isə mimimum təqaüd artan kimi pensiyaya çıxmaq üçün tələb olunan minimal kapital səviyyəsi də artır: “Bu gün 40320 manatdır, gələn ildən isə minimum təqaüd artdı deyə 46080 manat olacaq. Yəni, hər dəfə minimum pensiya artan kimi insanların minimum kapital səviyyəsi də yüksəlir, əlçatmaz olur. Çox yanlış qanun maddəsidir, mütləq dəyişdirilməlidir”.
Ekspert deyib ki, ölkədə minimum kapital səviyyəsinə çatmaq üçün maaşlar, gəlirlər yetərsizdir. Çox vətəndaş buna çata bilmir, bəzən heç təqaüd yaşına çatmadan dünyadan köçür: “Ədalətsizlik olur – insan işləyir, maaş və gəlirindən DSMF-də olan hesabına pul köçürür. Sonra pensiya almadan həyatdan köçəndə o vəsait ailəsinə qismət olmur, kiməsə vəsiyyət edə bilmir – bu da haqsızlıqdır, qanunda mütləq dəyişiklik edilməlidir”.
N.Cəfərli deyib ki, minimum əmək haqqı gözləntilərdən daha çox artırılıb. “Minimum maaş 400 manat, minimum təqaüd 320 manat olması yaxşıdır”.
