Fotoşəkillər tarixin bir anı, xatirələrin güzgüsüdür.
AzPost “FOTOXRONİKA” layihəsində oxucularına bu maraqlı şəkli təqdim edir.
46 il əvvəl -1979-cu ildə çəkilmiş fotoda Azərbyacan SSR Elmələr Akademiyasının Əlyazmalar İnstitunun əməkdaşları əks edilib.
Şəkildə Azərbaycanın sabiq prezidenti Əbülfəz Elçibəy, Azərbaycanın tanınmış xəttatı, AMEA-nın Məhəmməd Füzuli adına Əlyazmalar İnstitutunun əməkdaşı Müzafəddin Əzizov və İnstitutun əməkdaşı Ağabəy Əsgərov əks olunub.
M.Əzizov 1948-ci ildə Quba rayonunun Ayran kəndində anadan olub. 1966-cı ildə Azərbaycan Dövlət Universitetinin şərqşünaslıq fakültəsinin ərəb filologiyası şöbəsinə daxil olmuş və 1971-ci ildə oranı müvəffəqiyyətlə bitirib. Ərəb dili üzrə mütəxəssis kimi xarici ölkələrdə ezamiyyətlərdə olub, Yəmən Xalq Demokratik Respublikasında tərcüməçi işləyib, Liviya və bir sıra ölkələrdə çalışıb. Onun əmək fəaliyyətində xəttatlıq sənətinin ayrıca yeri var.
Müzafəddin Əzizov “Kitabi-Dədə Qorqud”un dünyada 3-cü əlyazma nüsxəsini yaradan məşhur xəttatdır.
Sovet dövründə AMEA-da çalışan Əbülfəz Elçibəy və Ağabəy Əsgərovun yaxşı münasibətləri olub. Onlar həmişə boş vaxtlarında şahmat oynayırmışlar. Sonradan keçmiş şahmat oyunçuları siyasi baxışlarına görə fərqli mövqelərdə olublar.
Elçibəy Azərbaycan Xalq Cəbhəsinin sədri, 1992-93-cü illərdə Azərbaycan prezidenti olub.
Ağabəy Əsgərov Yeni Azərbaycan Partiyasının yaradıcılarından və mərhum Heydər Əliyevə müraciəti imzalamış “91-lər”dən oldu. O həmçinin uzun illər “Səs” qəzetinə rəhbərlik edib. Daha sonra “Azərbaycan” Nəşriyyatının direktoru olub.
