Tender
Elm və Təhsil Nazirliyi yanında Təhsil Sisteminin İnformasiyalaşdırılması İdarəsinin keçirdiyi iri həcmli dövlət satınalmasının qalibi müəyyənləşib.
Söhbət “Ümumtəhsil məktəblərinin yüksəksürətli internet şəbəkəsinə qoşulması və şagirdlərin distant təhsilə cəlb olunması ilə əlaqədar məktəblərin fiber-optik kabellə internetə və daxili şəbəkəyə qoşulması” layihəsindən gedir.
Azpost.info bildirir ki, tenderin qalibi “TEXNO LYUKS M” Məhdud Məsuliyyətli Cəmiyyəti olub.
Müsabiqə Elm və Təhsil Nazirliyi yanında Təhsil Sisteminin İnformasiyalaşdırılması İdarəsi tərəfindən keçirilib. Tenderin ehtimal olunan dəyəri 7 milyon 998 min 388,60 manat təşkil edib.
Tender 3 iyun 2026-cı il tarixində elan olunub, təkliflərin qəbulu və zərflərin açılışı isə 3 iyul 2026-cı ildə baş tutub.
Layihə çərçivəsində ümumtəhsil məktəblərinin yüksəksürətli fiber-optik internet şəbəkəsinə qoşulması, daxili şəbəkə infrastrukturunun yaradılması və distant təhsilin texniki imkanlarının genişləndirilməsi nəzərdə tutulur.
“TEXNO LYUKS M” MMC hansı şirkətdir?
“TEXNO LYUKS M” MMC 19 oktyabr 2018-ci ildə dövlət qeydiyyatına alınıb. Şirkətin VÖEN-i 2905154871, nizamnamə kapitalı isə 50 manatdır. Hazırda şirkətin qanuni təmsilçisi Əliyev Emin Arif oğludur.
Şirkət əsasən informasiya texnologiyaları, rabitə infrastrukturu və təhsil müəssisələrinin rəqəmsallaşdırılması sahəsində fəaliyyət göstərir.
Son illərdə “TEXNO LYUKS M” xüsusilə Elm və Təhsil Nazirliyi yanında Təhsil Sisteminin İnformasiyalaşdırılması İdarəsinin keçirdiyi iri dövlət satınalmalarının daimi qaliblərindən biri kimi diqqət çəkir.
Məlumatlara görə, şirkət 2022–2026-cı illər ərzində ümumi dəyəri 44,4 milyon manatdan çox olan 9-dan artıq dövlət tenderinin qalibi olub.
Şirkətin icra etdiyi layihələr arasında məktəblərin fiber-optik internet şəbəkəsinə qoşulması, server və şəbəkə avadanlıqlarının alınması, IP telefoniya sistemlərinin qurulması, proqram təminatının tətbiqi və təhsil müəssisələrinin rəqəmsal infrastrukturunun yaradılması yer alır.
Bundan başqa, 2026-cı ildə Qarabağ Universitetinin maddi-texniki bazasının gücləndirilməsi və əlavə infrastrukturun qurulması məqsədilə də şirkətlə 7,29 milyon manat dəyərində müqavilə imzalanıb.
S.Abdulla
