Müasir həyat tərzi, iş və şəxsi problemlər insanlarda stressi artıran əsas səbəblərdən sayılır. AzPost.az xəbər verir ki, pandemiya dövründən sonra psixoloji gərginlik halları daha da çoxalıb. Psixoloqlar isə bildirirlər ki, bu cür vəziyyətlərdə ev şəraitində tətbiq edilə bilən sadə üsullarla stress səviyyəsini aşağı salmaq mümkündür.
Birinci üsul — nəfəs məşqləridir. Mütəxəssislər bildirirlər ki, dərindən nəfəs alıb-vermə məşqləri bədənin gərginliyini azaldır və zehnin sakitləşməsinə kömək edir. Bu metodu gündə cəmi 5 dəqiqə tətbiq etmək belə insanın özünü daha yaxşı hiss etməsinə səbəb olur.
İkinci üsul — bitkilərlə terapiyadır. Araşdırmalara görə, evdə bitkilərin olması stres və depressiya əlamətlərini azaldır. Xüsusilə lavanda, aloe vera və yapon bambuku kimi bitkilər insan psixologiyasına müsbət təsir edir.
Üçüncü texnika — aromaterapiyadır. Sakitləşdirici efir yağlarından istifadə etmək, evdə rahat bir atmosfer yaradır. Lavanda, limon və ylang-ylang efir yağları günün yorğunluğunu və gərginliyini aradan qaldırmaq üçün çox effektiv sayılır.
Dördüncü üsul — yüngül fiziki məşqlərdir. Psixoloqlar bildirir ki, ev şəraitində edilən sadə hərəkətlər və ya qısa gəzintilər qan dövranını yaxşılaşdırır, əzələləri rahatladır və beyni təmizləyir. Xüsusilə axşam saatlarında edilən hərəkətlər yuxu keyfiyyətinə də müsbət təsir göstərir.
Beşinci və ən önəmli üsul isə — telefon və sosial şəbəkələrdən uzaq qalmaqdır. Gün ərzində həddən artıq sosial media istifadəsi stress səviyyəsini yüksəldir və əsəbləri daha da həssaslaşdırır. Psixoloqlar hər gün ən azı 1 saat sosial şəbəkələrdən uzaq durmağı və sakit musiqi dinləməyi tövsiyə edirlər.
Bundan əlavə, psixoloji rahatlıq üçün sevdiyiniz bir kitab oxumaq və ya musiqi dinləmək də əhval-ruhiyyəni müsbətə dəyişir. Mütəxəssislər qeyd edir ki, evdə stressi azaltmaq üçün bu kimi sadə üsullar davamlı tətbiq edildikdə, həyat keyfiyyəti və psixoloji vəziyyət nəzərəçarpacaq dərəcədə yaxşılaşır.
