ABŞ prezidenti Donald Tramp bildirib ki, futbol üzrə dünya çempionatı zamanı oyunların hansı şəhərlərdə keçiriləcəyinə ev sahibi ölkə – ABŞ qərar verə bilər.
O vurğulayıb ki, təhlükəsizliklə bağlı narahatlıq yarandığı halda, FIFA prezidenti Canni İnfantinoya zəng edərək oyunların başqa şəhərə köçürülməsini təklif edəcək.
FIFA Trampın bu açıqlamasına münasibət bildirərək təsdiqləyib ki, hökumətlər, o cümlədən ABŞ hökuməti, turnirin keçirildiyi şəhərlərdə təhlükəsizlik məsələlərinə cavabdehdir və hansı şəhərlərin təhlükəsiz hesab ediləcəyinə qərar vermək hüququna malikdir. Qurum əlavə edib ki, “təhlükəsizlik və ictimai asayiş bütün tədbirlərdə ən yüksək prioritet olmalıdır”.
Donald Tramp son açıqlamalarında Demokrat Partiyasının idarə etdiyi şəhərlərdə cinayətkarlığın artdığını tənqid edib və Kaliforniyanın həm 2026-cı il dünya çempionatından, həm də 2028-ci il Los-Anceles Yay Olimpiya Oyunlarından məhrum ola biləcəyini istisna etməyib.
Xatırladaq ki, 2026-cı ildə keçiriləcək genişlənmiş (48 komandadan ibarət) dünya çempionatının 104 oyunundan 78-i ABŞ-da, qalanı isə Kanada və Meksikada baş tutacaq. Final qarşılaşması Nyu-Cersidəki stadionda oynanılacaq.
Tramp və FIFA prezidenti Canni İnfantino arasında münasibətlər Trampın ilk prezidentlik dövründən başlayır. Onlar müxtəlif beynəlxalq sammitlərdə birgə iştirak edib və sonuncu dəfə Yaxın Şərqdə keçirilən sülh sammitində görüşüblər.
