Rusiya Federal Təhlükəsizlik Xidməti ölkənin bütün teatrlarını ideoloji nəzarət altına almaq üçün müstəqil teatr xadimlərinə qarşı illərlə mübarizə aparıb.
Azpost.info xəbər verir ki, bunu “Meduza”nın əldə etdiyi məlumatlar (FTX zabiti Sergey Dubovun yazışmaları) ortaya çıxarıb.
“Meduza” yazır ki, FTX “Yeddinci Studiya” işində – Kiril Serebrennikovun məhkəməsində ittiham tərəfinə kömək etdi, rejissor Jenya Berkoviçə və Ukraynadakı müharibəyə qarşı çıxan aktrisa Varvara Şmıkovaya təzyiq və gözdənsalma kampaniyası apardı, teatr tənqidçisi Marina Davıdovaya qarşı ittihamedici sübutlar topladı, həm də dövlətin ölkənin əsas teatr festivalı “Qızıl maska”nı özünə tabe etməsinə kömək etdi.
“Bir çox müstəqil və müxalif düşüncəli teatr xadimlərini təqib etmək üçün FTX “Podkoverka” Teleqram kanalından istifadə edirdi. Məsələn, müstəqil teatrı tənqid edən bir təbliğat videosu nümayiş etdirildi, burada Marina Davıdovanın İsrail pasportunun fotoşəkili, eləcə də ABŞ vizası ilə bir səhifə göstərildi. Başqa bir misal, 2022-ci ilin yayında rejissor Jenya Berkoviçin intim fotolarının dərc edilməsidir, bir il sonra bir tamaşaya görə “terrorçuluğa haqq qazandırmaqda” ittiham edilərək istintaq təcridxanasına göndərildi. Bənzər bir hekayə aktrisa Varvara Şmıkova ilə də baş verdi. Onun çılpaq fotoları “Podkoverka”da dərc olundu və bundan sonra o, Rusiyada normal işləmək imkanını itirdi”, – nəşr qeyd edib.
“Meduza” yazır ki, bir çox müstəqil mədəniyyət xadimi “Podkoverka” və digər hökumətyönlü Teleqram kanallarında oxşar nəşrlərdən sonra müntəzəm olaraq problemlərlə üzləşiblər: “Teatr işçilərinə görə, fotoların çoxu “Teleqram”dakı şəxsi yazışmalardandır. FTX-ya aid olan eyni İP ünvandan messencer hesabları sındırılıb”.
Azpost.info
