General-leytenant Rüstəm Muradov Rusiya Silahlı Qüvvələri Şərq Hərbi Dairəsinin komandanı təyin edilib.
Azpost.info xəbər verir ki, o, bu vəzifədə general-polkovnik Aleksandr Çaykonu əvəz edəcək.
“Rusiya Qəhrəmanı Rüstəm Usmanoviç Muradov ölkənin döyüş tərkibinə görə ən qüdrətli hərbi dairələrindən biri olan Şərq Hərbi Dairəsinin komandanı təyin edilib”, – məlumatda bildirilir.
Rüstəm Muradov 1973-cü ildə Dağıstanın Dərbənd rayonunun Çinar kəndində anadan olub. O, Sankt-Peterburq Ali Əlahiddə Ümumqoşun Komandanlıq Məktəbinin, Rusiya Silahlı Qüvvələrinin Əlahiddə Ümumqoşun Akademiyasının və Rusiya Silahlı Qüvvələri Baş Qərargahının Hərbi Akademiyasının məzunudur.
R.Muradov 2017-ci ilin noyabrından 2019-cu ilin yanvarınadək Volqaboyu Mərkəzi Hərbi Dairəsinin 2-ci Qvardiya Əlahiddə Ümumqoşun Ordusuna rəhbərlik edib. Daha sonra Cənub Hərbi Dairəsinin komandirinin müavini təyin edilib. 2020-ci ilin noyabrından 2021-ci ilin sentyabrına kimi o, Rusiyanın Qarabağda müvəqqəti yerləşdirilən sülhməramlı kontingentinə rəhbərlik edib.
2020-ci ilin fevralında Rusiya prezidenti Vladimir Putin Muradova general-leytenant rütbəsi verib.
2022-ci ilin iyulunda Rüstəm Muradovun Donbasda xüsusi əməliyyatda iştirak edən “Vostok” qruplaşmasına komandanlıq etdiyi məlum olub.
Azpost.info
