29 dekabr gecəsi Günəşdə yüksək aktivlik müşahidə olunub. AzPost xəbər verir ki, Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş astronomiyası laboratoriyasının yaydığı məlumata görə, cəmi üç saat ərzində Günəşdə üç güclü M sinifli alışma baş verib.
Məlumatda bildirilir ki, alışmalar Moskva vaxtı ilə saat 00:13, 01:39 və 03:02-də qeydə alınıb. Bu alışmalar arasında ən güclüsü M4.2 səviyyəsinə çatıb. Alimlərin sözlərinə görə, bu göstərici 27 dekabr gecəsi müşahidə olunan alışmadan bir qədər zəif olsa da, Günəşdə aktiv proseslərin davam etdiyini göstərir.
İKİ RAN mütəxəssisləri 29 dekabr tarixində Günəşdə əlavə olaraq üç C sinifli, yəni nisbətən zəif alışmanın da baş verdiyini açıqlayıblar. Bu cür alışmalar Günəşin aktiv fazada olduğunu təsdiqləyən göstəricilərdən biri hesab olunur.
Qeyd olunur ki, M sinifli alışmalar Yerə yaxın kosmik mühitə təsir göstərə, radioəlaqədə qısamüddətli pozuntulara və geomaqnit sahəsində zəif dəyişikliklərə səbəb ola bilər. Hazırda Günəşdəki vəziyyət mütəxəssislər tərəfindən diqqətlə izlənilir.
Alimlər yaxın günlərdə Günəş aktivliyinin davam edib-etməyəcəyinin əlavə müşahidələrdən sonra dəqiqləşdiriləcəyini bildiriblər.
