Pəhrizdə zülal və yağ çatışmazlığı kişilərdə seyrək saqqalın çıxmasına təsir edən amillər ola bilər.
AzPost bildirir ki, bu barədə dermatoloq Pol Farrant və dietoloq Amanda Serif Daily Mail-ə verdiyi müsahibədə deyiblər.
Farrant üz tüklərinin sıxlığına bədənin testosteronun törəməsi olan dihidrotestosteronun (DHT) təsir etdiyini vurğulayıb. DHT, xayalarda, prostatda, yumurtalıqlarda, eləcə də digər orqanlarda və periferik toxumalarda, xüsusən də qaraciyərdə, dəridə və saç follikullarında yerləşən xüsusi hədəf hüceyrələrində istehsal olunur. Bu parametr genetika ilə müəyyən edilir: DHT-yə həssaslıq nə qədər yüksəkdirsə, saqqal bir o qədər həcmli olur, lakin keçəlləşmə riski də artır.
Həkim qeyd etdi ki, saqqalın uzanmasını sürətləndirmək üçün xüsusi dərmanlar mövcuddur. Lakin onların istifadəsi həkim nəzarəti altında olmalıdır. Dietoloq Serif əlavə etdi ki, əksər hallarda pəhriz tənzimləmələri problemi həll edə bilər.
“Yaxşı qida saqqalın ən yaxşı dostudur. Saç zülaldan ibarətdir, ona görə də amin turşularının – məsələn, ətdən, balıqdan, mərciməkdən və yumurtadan – alınması böyümə üçün vacibdir”, – deyə o izah edib.
Serif həmçinin skumbriya, qızılbalıq, qoz-fındıq və avokadoda olan sağlam yağların istehlakını artırmağı tövsiyə edib, çünki onlar hormonal sintezdə rol oynayır.
Mütəxəssis saqqal böyüməsini stimullaşdırmaq üçün pəhriz əlavələrini təsirsiz bir üsul kimi rədd edib. Həkimin sözlərinə görə, bu əlavələr yalnız bədəndə müəyyən qida maddələrinin təsdiqlənmiş çatışmazlığı olduqda saç böyüməsini stimullaşdıra bilər. O, həmçinin riski nəzərə alaraq pəhriz əlavələrinin saç dərmanları ilə birləşdirilməsinin potensial təhlükələri barədə xəbərdarlıq edib.
