Pulmonoloq Andrey Malyavin öskürəyin düzgün müalicə qaydalarını açıqlayıb
Payız mövsümünün başlaması ilə soyuqdəymə və tənəffüs yolu infeksiyalarının sayı artır, bu isə çox vaxt öskürəklə müşayiət olunur. Rusiya Səhiyyə Nazirliyinin Mərkəzi Federal Dairə üzrə baş pulmonoloqu, professor Andrey Malyavin öskürəklə mübarizədə yol verilən əsas səhvləri açıqlayıb.
AzPost xəbər verir ki, həkimin sözlərinə görə, əgər öskürək bəlğəmlidirsə, onu boğmaq yolverilməzdir. Çünki bu zaman bəlğəm ağciyərlərdə yığılıb qalır və iltihaba səbəb ola bilər. Əgər öskürək quru xarakter daşıyırsa, o zaman onu azaldan preparatlar istifadə oluna bilər.
“Yaş öskürək zamanı ən düzgün seçim mukolitik preparatlardır. Onlar bəlğəmi durulaşdırır, orqanizmdən çıxmasını asanlaşdırır, lakin onun miqdarını artırmır”, – deyə həkim qeyd edib.
Malyavinin sözlərinə görə, bəzi insanlar özbaşına müalicəyə üstünlük verərək, qlitsirriz (şamlıq otu), altey kökü və ya digər xalq vasitələrindən istifadə edir, lakin bu, bəzən vəziyyəti ağırlaşdıra bilər:
“Əksər bitki mənşəli dərmanlar əslində qusdurucu təsirə malikdir. Ona görə də həkimlə məsləhətləşmədən belə vasitələrdən istifadə etmək düzgün deyil.”
Pulmonoloq həmçinin vurğulayıb ki, quru öskürək zamanı narkotik təsirə malik olmayan, asılılıq yaratmayan müasir öskürəkəleyhinə dərmanlar seçilməlidir. Onlar yalnız çox güclü, narahatlıq yaradan hallarda istifadə edilməlidir.
Mütəxəssis xəstələri özbaşına dərman qəbul etməməyə, öskürəyin səbəbini müəyyənləşdirmək üçün həkimə müraciət etməyə çağırıb.
