Sinə göynməsindən əziyyət çəkən insanların su qəbulunda bəzi sadə qaydalara diqqət etməsi məsləhət görülür.
AzPost xəbər verir ki, NEWS.ru-ya danışan gastroenteroloq Lüdmilə Suxorukovanın sözlərinə görə, yemək zamanı su içmək bəzən sinə göynməsini artırır və mədədə əlavə narahatlıq yaradır. O bildirib ki, belə hallarda suyu yeməkdən bir qədər əvvəl və ya sonra içmək daha uyğundur.
Həkim vurğulayıb ki, qidanı su ilə “yumaq” adətən həzmi ləngidir, mədədə dolğunluq hissi yaradır və yanğını gücləndirə bilər. Bu səbəbdən yemək əsnasında su qəbulunu minimuma endirmək, ehtiyac olarsa qısa fasilələrlə kiçik qurtumlar içmək tövsiyə olunur.
Suxorukova əlavə edib ki, bəzi insanlarda suyu qida ilə birlikdə içmək ümumiyyətlə uyğunsuzluq yaradır. Onun fikrincə, hər kəs öz bədəninin reaksiyasına diqqət etməli və narahatlıq hiss olunursa, suyu yeməkdən ayrı vaxtlarda qəbul etməlidir. Bu yanaşma həm sinə göynməsinin qarşısını almağa, həm də həzmin daha rahat olmasına kömək edir.
