Türkiyənin xarici işlər naziri Hakan Fidan sentyabrın 15–16-da Azərbaycana səfər edəcək.
Türkiyənin xarici işlər naziri Hakan Fidanın Azərbaycana səfəri zamanı iki ölkə arasında strateji əməkdaşlığın inkişafı, müdafiə sənayesi, enerji və nəqliyyat layihələri, eləcə də Azərbaycan-Ermənistan sülh prosesi müzakirə olunacaq.
Anadolu Agentliyinin Türkiyə Xarici İşlər Nazirliyindəki mənbələrə istinadən yaydığı məlumata görə, Fidan səfər çərçivəsində Azərbaycanın xarici işlər naziri Ceyhun Bayramovla ikitərəfli və geniş tərkibdə görüşlər keçirəcək.
Türkiyəli nazirin Azərbaycanın müdafiə naziri Zakir Həsənovla da görüşü nəzərdə tutulur.
Bundan əlavə, Hakan Fidanın Prezident İlham Əliyev tərəfindən qəbul ediləcəyi gözlənilir.
15 milyard dollarlıq ticarət hədəfi
Görüşlərdə Azərbaycan-Türkiyə münasibətlərinin strateji xarakterinin daha da inkişaf etdirilməsi əsas mövzulardan biri olacaq.
Hakan Fidan iki ölkə arasında əməkdaşlığın əldə etdiyi səviyyədən məmnunluğu ifadə edəcək və dövlət başçıları tərəfindən müəyyən edilmiş qarşılıqlı ticarət dövriyyəsinin 15 milyard dollara çatdırılması hədəfinə nail olmaq üçün işlərin sürətləndirilməsinin vacibliyini vurğulayacaq.
Birgə layihələr, enerji və nəqliyyat məsələləri də danışıqların gündəliyində olacaq.
Müdafiə və təhlükəsizlik məsələləri
Türkiyə və Azərbaycanın müttəfiq dövlətlər kimi müdafiə sənayesi, təhlükəsizlik və hərbi sahələrdə davam edən əməkdaşlığına da xüsusi diqqət yetiriləcək.
Tərəflərin çoxtərəfli platformalarda, xüsusilə Türk Dövlətləri Təşkilatı (TDT) çərçivəsində əməkdaşlıq barədə fikir mübadiləsi aparacağı bildirilir.
Fidanın Azərbaycanın tərəfi ilə TDT-nin qarşıdakı 13-cü Zirvə görüşünü, eləcə də Türkiyənin iştirakı ilə keçiriləcək COP31-i müzakirə edəcəyi gözlənilir.
Azərbaycan-Ermənistan sülh prosesi də gündəmdə olacaq
Danışıqların mühüm mövzularından biri Azərbaycan-Ermənistan sülh prosesi olacaq.
Hakan Fidanın Azərbaycan və Ermənistan arasında sülhün təmin olunması üçün tarixi imkan yarandığını vurğulayacağı gözlənilir.
Türkiyə tərəfi iki ölkə arasında mehriban qonşuluq münasibətlərinin qurulmasını dəstəklədiyini bir daha bildirəcək və əldə olunmuş irəliləyişə müsbət qiymət verəcək.
Bununla yanaşı, Fidan Azərbaycanın Qarabağda infrastrukturun bərpası, enerji və ticarət marşrutlarının inkişaf etdirilməsi, həmçinin regionda əlaqəliliyin gücləndirilməsi istiqamətində səylərinə dəstəyini ifadə edəcək.
Görüşlər zamanı regional və beynəlxalq gündəmin aktual məsələləri üzrə də fikir mübadiləsi aparılacaq.
