Süd
Südün tərkibindəki yağ miqdarı ürək və qan damarlarının sağlamlığına birbaşa təsir göstərir. AzPost Sports.kz-yə istinadla xəbər verir ki, dietoloq və qastroenteroloq Nuriyə Diyanova yüksək yağlı südün ürək xəstəlikləri ilə bağlı riskləri artıra bildiyini bildirib.
Mütəxəssisin sözlərinə görə, Norveçdə aparılan geniş araşdırma südün yağlılıq dərəcəsinin sağlamlığa təsirini açıq şəkildə göstərib. Tədqiqat nəticələrinə əsasən, ümumi süd istehlakının çox olması həm ürək-damar xəstəlikləri, həm də ümumi ölüm riski ilə əlaqələndirilib. Xüsusilə 3,8 faiz yağlılıqda olan tam südün istifadəsi iskemik ürək xəstəliyi və ümumi ölüm göstəricilərini artırır.
Araşdırma göstərib ki, bu mənfi təsirlər qadınlarda daha qabarıqdır və tam südün gündəlik qəbulunun hər 100 qram artırılması ürək-damar mənşəli ölüm riskini yüksəldir.
Bunun əksinə olaraq, 0,5 faiz yağlılıqda olan yağsız süd daha təhlükəsiz hesab olunur. Məlum olub ki, belə südün istehlakı ürək-damar xəstəlikləri və kəskin miokard infarktı nəticəsində ölüm riski ilə tərs əlaqəyə malikdir, xüsusilə də qadınlarda.
Diyanova bildirib ki, ürək və damar sağlamlığını qorumaq üçün tam südü yağsız və ya az yağlı (1,5 faiz yağlılıqda) süd ilə əvəz etmək daha məqsədəuyğundur.
Onun sözlərinə görə, bitki mənşəli südlər də alternativ kimi istifadə oluna bilər. Mütəxəssis əvvəlcə yağsız südü bitki mənşəli süd ilə qarışdıraraq keçid etməyi, daha sonra isə tamamilə bitki əsaslı variantlara yönəlməyi məsləhət görür.
Südü pəhrizdən tam çıxaranların isə kalsium mənbələrini unutmaması vacibdir. Bu baxımdan küncüt, müxtəlif çərəzlər, toxumlar və xumus kimi məhsullar uyğun seçim ola bilər.
