Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev 22 İyul – Milli Mətbuat Günü münasibətilə Azərbaycan mediasını təbrik edib.
Azpost.info xəbər verir ki, Hikmət Hacıyev bununla bağlı “X” sosial şəbəkəsində paylaşım edib.
O bildirib ki, Azərbaycan milli mətbuatının əsası 1875-ci il iyulun 22-də böyük maarifçi Həsən bəy Zərdabi tərəfindən qoyulub və bu yol əsl vətənpərvərlik, dövlətçilik ideyalarına sədaqət və milli tərəqqi uğrunda mübarizənin parlaq nümunəsidir.
Prezidentin köməkçisi vurğulayıb ki, 1990-cı illərin ortalarından etibarən Ümummilli Lider Heydər Əliyevin rəhbərliyi ilə həyata keçirilən media siyasəti ölkədə söz və məlumat azadlığının, fikir plüralizminin təmin olunması ilə yanaşı, peşəkar və güclü medianın formalaşması üçün etibarlı zəmin yaradıb.
Onun sözlərinə görə, sonrakı dövrdə bu siyasətin Prezident İlham Əliyev tərəfindən uğurla davam etdirilməsi nəticəsində Azərbaycan mediası müasir çağırışlara uyğun inkişaf edib və qlobal informasiya məkanında təsir imkanlarını genişləndirib.
Hikmət Hacıyev qeyd edib ki, 44 günlük Vətən müharibəsi zamanı Azərbaycan mediası yüksək vətənpərvərlik və həmrəylik nümayiş etdirərək ölkənin haqq səsinin dünya ictimaiyyətinə çatdırılmasında, həmçinin Azərbaycana qarşı aparılan informasiya təxribatlarının ifşasında mühüm rol oynayıb.
O, Prezident İlham Əliyevin Azərbaycan mediası ilə bağlı fikirlərini də xatırladıb. Dövlət başçısının sözlərinə görə, Azərbaycan mediası artıq təkcə ölkə daxilində deyil, beynəlxalq müstəvidə də böyük nüfuz qazanıb, dövlət maraqlarını müdafiə etməyə, əsassız ittihamları faktlar və ciddi təhlillərlə ifşa etməyə qadirdir.
Prezidentin köməkçisi bildirib ki, dünyada mürəkkəb geosiyasi proseslərin davam etdiyi bir vaxtda Azərbaycan müstəqil və prinsipial siyasət yürüdür, media isə öz fəaliyyətini yeni reallıqlara uyğunlaşdıraraq rəqəmsallaşma, süni intellekt və digər müasir texnologiyaların tətbiqi istiqamətində fəallıq nümayiş etdirir.
Hikmət Hacıyev əmin olduğunu bildirib ki, Azərbaycan mediası gələcəkdə də qlobal informasiya məkanında mövqelərini daha da möhkəmləndirəcək, milli maraqların qorunması, vətənpərvərlik və milli həmrəyliyin gücləndirilməsi istiqamətində fəaliyyətini davam etdirəcək.
Sonda Prezidentin köməkçisi Milli Mətbuat Günü münasibətilə bütün jurnalistləri təbrik edib, onlara möhkəm cansağlığı və peşə fəaliyyətlərində uğurlar arzulayıb.
