Üzgüçülük sağlamlıq üçün faydalı olsa da, hovuzların düzgün gigiyena qaydalarına əməl edilmədiyi halda müxtəlif infeksiyalar üçün mənbəyə çevrilə bilər. AzPost xəbər verir ki, bu barədə NEWS.ru-ya açıqlamasında həkim-terapevt Yelena Pavlova danışıb.
Mütəxəssisin sözlərinə görə, əsas risk suyun lazımi dərəcədə dezinfeksiya olunmaması ilə bağlıdır. Xlorun az olması, rütubət və ziyarətçilər arasında şəxsi gigiyenaya əməl edilməməsi xəstəliklərin yayılmasına şərait yaradır. Həkim bildirir ki, belə hallarda insanlar aşağıdakı infeksiyalara yoluxa bilərlər:
-
dəri infeksiyaları – xüsusilə qızartı və qaşınma ilə özünü göstərən follikulit;
-
bağırsaq infeksiyaları – ləmblia, eyni zamanda Escherichia coli kimi bakteriyaların suya düşməsi nəticəsində yaranan xəstəliklər;
-
göbələk xəstəlikləri – ayaq altı və dırnaq göbələyi nəm səthlərdə uzun müddət qala bilər;
-
HPV mənşəli ziyillər – daha çox hovuz ərazisində çılpaq ayaqla gəzənlərdə rast gəlinir.
Pavlova həmçinin vurğulayıb ki, xlorun tər və sidiklə reaksiyaya girməsi göz və dəridə qıcıqlanma yarada bilər. Gözlərin qızarması suyun kifayət qədər təmizlənmədiyinin göstəricisidir.
İnfeksiyalardan qorunmaq üçün həkim aşağıdakı qaydalara əməl etməyi tövsiyə edir:
-
hovuzdan əvvəl mütləq sabunla duş qəbul etmək;
-
suya yalnız xüsusi geyim – çimərlik kostyumu, üzgüçülük papağı və eynəyi ilə girmək;
-
suyu qətiyyən udmamaq, əlləri ağıza aparmamaq;
-
hovuz ərazisində ayaqyalın gəzməmək;
-
çıxışdan sonra yenidən duş qəbul edib bədəni yaxşı qurulamaq.
Mütəxəssis qeyd edib ki, sadə gigiyena qaydaları və diqqət insanı hovuzdan rahat şəkildə yararlanmağa imkan verir.
